Umkhokheli welinye lamacele awe MDC-T umnumzana Morgan Tsvangirai, okwakhathesi osekwethekeleleni kwele Bhilithani, ukhangelelwe ukuhlangana lonobhala obona ngezobudlelwano balelo lizwe lamanye amazwe womhlaba umnumzana Philip Hammond. Lokhu ngokwakuqala ukuthi ahlangane lenkokheli yamanye amazwe lokhe wanqotshwayo kukhetho lwanyakenye nngumongameli Robert Mugabe.
UTsvangirai umenywe e-London yinhlanganiso yengcwethi ezibona ngentuthuko yamazwe womhlaba eye Chatham House, ukuzophatheka kungxoxo mpikiswano ephathelane lomumo wezinto eZimbabwe ngemva kokhetho lwanyakenye.
Kulokungahlaliseki okukhona elizweni njengoba umnotho obukade ungani uyathuthuka ngesikhathi sikahulumende womanyano usubuyela emuva.
Ukuqhubekela phambili kokuwa kwamandla e-Rand lakwele South Africa, ukungathuthuki komsebenzi wokulungisa izinto ezingathengiswa kwamanye amazwe, ukulahlekelwa kwabanengi yimisebenzi kungabunjwa eminye, ngokunye kokuhluzwa kulingxoxo.