UMongameli Emmerson Mnangagwa, othi ilizwe lakhe lifisa ukudlelana kahle lamazwe entshonalanga lamanye, wenze imihlangano embalwa ngoLwesine eMelika lenkokheli yakwele Venuezela lamanye, okuthiwa ephula ilungelo loluntu.
Abacubungula ezombusazwe bathi uMnangagwa kukhanya eqinisa ubudlelwano lamazwe akhahlameza uzulu hatshi alombuso okhululekileyo.
Ekhuluma izolo emhlanganweni wamazwe omhlaba wonke jikelele oweUnited Nations General Assembly, oqhubekela phambili eNew York, uMnangagwa uthe ufisa ukuba eleZimbabwe lidlelane lamazwe atshiyeneyo.
Lokhu kuchothozwa ngabantu abanengi abathi uMnangagwa ufisa ukuba eleZimbabwe liqhubekela phambili lidlelana leleRussia, eleChina lamanye ancedisa ukuba ilizwe lithole uzibuse.
Amazwe entshonalanga ethesa inkokheli yebandla leZanu PF izijeziso zenotho. UNkosazana Khethiwe Bhebhe uthi uMnangagwa udinga ubudlelwano ngamehlo abomvu.
Uthi lokhu akusoze kuncede eleZimbabwe ngoba ubudlelwano abuthengwa.
UMaBhebhe uthi kumele uMnangagwa labanye bakhe belungise okuhlupha uzulu engakadingi abangane emhlabeni wonke jikelele.
UMnu. Elifasi Mashaba, okubandla leZanu PF, uthi uMnangagwa usebenza gadalala ukwenzela ukuba eleZimbabwe lidlelana kahle lamanye amazwe.
UMashaba uthi eleZimbabwe lilakho ukudlelana lamazwe ethesa inkokheli yebandla leZanu PF izijeziso zenotho.
Okwamanje uthi eleZimbabwe lidlelana lamazwe amanengi.
UMnangagwa labanye abakhe betheswa izijeziso zenotho besetheswa umlandu wokungaqhubi kahle ukhetho lokwephula ilungelo loluntu.