WASHINGTON - Usuqalile umhlangano omkhulu kwele Melika oweU.S-Africa Leaders Summit, owenzelwa esigodlweni selizwe leli leWashington DC lapho uMongameli Joseph Biden okhangelelwe ukuxoxisana lenkokheli yezwekazi leAfrica ngoLwesithathu ngenhlelo ezitshiyeneyo ezigoqela ezombusazwe, ukukhudumala komkhathi, ezempilakahle, ukuthuthukisa umnotho womhlaba wonke jikelele lokunye.
Umhlangano lo usungulwe ngomhlangano wabatsha obekugcwele khona abadabuka emazweni agoqela eleZimbabwe.
UMnu. Antony Blinken, umphathintambo kahulumende weMelika obona ngokudlelana lamanye amazwe, utshele abasemhlanganweni wabatsha oweAfrican and Diaspora Young Leaders Forum ukuthi kunengi okungenziwa ngabatsha okungaguqula umhlaba wonke jikelele.
Omunye okhulume emhlanhanweni lo uMnu. James Manyika, umsekeli kamongameli wenkampani yeGoogle obona ngezemitshina lozulu, uthe abatsha kumele bephume lendlela ezinengi zokuzithuthukisa lokuthuthukisa uzulu.
Kuqhutshwe eminye njalo imihlangano, egoqela obuhlolisisa ezomvikela owePeace, Security and Governance Forum, ongenwe yiziphathamandla zakwele Zimbabwe ezibalisa uMnu. Frederick Shava, omele uMongameli Emmerson Mnangagwa/
Umongameli wakwele Zimbabwe ngomunye wabangavunyelwa ukwethekelela kwele Melika ngenxa yezijeziso zenotho azetheswa ngamazwe entshonalanga athi uhulumende webandla leZanu PF wephula ilungelo loluntu njalo wehluleka ukuqhuba ukhetho olukhululekileyo.
EleMelika lifakele uMnu. Emmerson Mnangagwa Jnr., umntaka Mnangagwa, labanye izijeziso zenotho lisithi benza okungekho emthethweni ngoba badlelana loMnu. Kudakwashe Tagwirei, okuthiwa wenza imali emangalisayo esebenzisa iziphathamandla zakwele Zimbabwe.
Kusenjalo, uBiden ukhangelelwe ukuba uzakwethula umbiko wakhe oqakathekileyo ngoLwesithathu omayelana lomhlangano weU.S. Africa Leaders Summit.
Umhlangano lo wasungulwa ngowayengumongameli, uMnu. Barack Obama, ngomnyaka ka2014.
Omunye wabasemhlanganweni longuNkosazana Blondie Ndebele, odabuka eZimbabwe ongene umhlangano wabatsha lowokuvimba ukukhudumala komkhathi.