WASHINGTON DC - Ugqitshwe ngoLwesine umhlangano weU.S-Africa Leaders Summit eWashington DC kuleyinye inkokheli yezwekazi leAfrica elakho ukuthola inzuzo emangalisayo kulandela umhlangano lo kube njalo lamazwe anjenge leZimbabwe okungaziwa ukuba izatholani.
Ingakabuyeli ekhaya inkokheli yezwekazi leAfrica, okhokhela umanyano weAfrican Union ucele uMongameli Joseph Biden ukuba esule izijeziso zenotho ezetheswa uMongameli Emmerson Mnangagwa labanye.
UBiden utshele inkokheli yezwekazi leAfrica emaphethelweni omhlangano lo ukuba uzakwethekelela izwekazi leli ngomnyaka ozayo njalo uzakwethulela amazwe atshiyeneyo imali yokuqhuba inhlelo ezitshiyeneyo.
Lolu kuzakuba luhambo lwakuqala kuzwekazi leAfrica selokhu wangena esikhundleni sikamongameli. Kukhangelelwe ukuba eleMelika lizanika amazwe aqhuba ukhetho izigidi ezilikhulu lamatshuma ayisithupha lanhlanu zamadola – US$165 million. Imali le ngeyokuthi kuqhutshwe ukhetho olubalulekileyo. UBiden uthi izwekezi leAfrica kumele lincediswe ngele Melika ukuze amazwe athuthuke ngemfanelo.
Lokhu kusekelwa nguMnu. Anthony Blinken, ophethe uhlangothi lukahulumende olubona ngokudlelana lamanye amazwe.
UMongameli Macky Sall ucele uBiden ukuba esule izijeziso zenotho ezetheswa uMnangagwa labanye bakhe.
UMnu. Munashe Mtutsa, okubandla leZanu PF, uthi uSall uyitshaye ekhaleni.
Uphinde wathi kuyabukeka ukuba eleZimbabwe liphatheke emhlanganweni lo lapho ebelimelwe ngumphathintambo kahulumende obona ngokudlelana lamanye amazwe, uMnu. Frederick Shava.
Kodwa uMnu. Msongelwa Ndlovu, isikhulumele sebandla leZapu, uthi uSall labanye bakhe babanjwa amehlo nguMnangagwa.
UNdlovu uphinde wathi akuqedakali okuzatholwa ngele Zimbabwe kulandela ukugqitshwa komhlangano weU.S – Africa Leaders Summit eWashington DC.