Besisidla Umfushwa Olamagundwane Lamatshongololo Ejele yeMlondolozi, Kutsho Amalunga eMRP Asanda Ukukhululwa
Amalunga ebandla leMthwakazi Republic Party asanda ukukhululwa ejele yeMlondolozi abalisa uNkosazana Sibongile Banda loNkosazana Busi Moyo athi abesifazana bayahlupheka kule intolongo ngoba kungelakudla okweneleyo kumbe okuhlanzekileyo njalo amalungelo abo esephulwa.
Ababili laba bahlale okweminyaka emithathu eMlondolozi njalo bake bayasebenzela ingxenye yesigwebo sabo eChikurubi eHarare. UNkosazana Moyo uthi kusobala ukuba amagundwane lamatshongololo ayefela emfushweni nxa uchaywa, besekuphoselwa kunjalo embizeni, baphakelwe kungavuthwa. “Sasisidla sikhetha uboya bamagundwane lamatshongololo silahlele khatshana sidle kuphela, ngoba ungekela kwakungelayinye i plan,” kugcizelela uNkosazana Moyo.
UNkosazana Banda uthi umfushwa wakhona uyabe ungelamafutha, indumba zingavuthwanga, njalo impuphu imnyama-tshu okungaqedakaliyo.
Uqhubeke wathi amalungelo akhe awokholo lwesiMoslem ayengananzwa ngoba wayephoqwa ukuya esontweni lesiKhristu, kuthiwa akulamuntu okufanele asale emuva abanye besiyakhonza.
“Bengisehluleka ukukhuleka okweminyaka embili edluleyo, eMlondolozi. Kodwa eChikurubi babengangibambi ngamandla ukuthi ngiye enkonzweni yabo…… Okunye okungimangalisayo yikuthi abejele yeMlondolozi, inengi kungabeSiShoneni, balolunya kulamaShona eChikurubi. Uyaguqela umuntu ongangomzukulu wakho, ungekela uyajeziswa uyehlanza izambuzi,” kuphawula uNkosazana Banda.
Uthe kuzwisa ubuhlungu ukuthi izibotshwa ziyabuyela ejele ngemva kwenyanga ezimbalwa zikhululwe, njalo sezize zibizwa ngokuthi ngo “Madzoka.”
Uthi ngabe inhlanganiso ezinjenge Amnesty International ziyangenela ekubasizeni njalo lezihlobo zibamukele ukwenzela ukuthi zingaphindeli ejele.
Asenelisanga ukukhuluma ngaloludaba leziphathamandla zejele kumbe ezogatsha lukahulumende olubona ngezemithetho.
UNkosazana Moyo, uthi ufisa ukuthola imali yokuqhubeka ngebhizimusi yakhe yokuthenga, kumbe athole umsebenzi, ngoba impahla zakhe zasala zichitheka esejele. Ugqibe wathi: “Bekulukhuni ejele, besigula, sikhwehlela, kodwa siphume singabaphilileyo...... Siyaqhubeka ngomzabalazo.”
Forum