Uhulumende wazise izolo ukuba kulabantwana abangamatshumi amathathu lanhlanu babulewe ngumkhuhlane wendingindi phakathi kwenyanga eyodwa eHurungwe, eMashonaland West.
Isikhulumeli sikahulumende uMnu Nick Mangwana ulobe enkundleli yokuxhumana yebulenjini eye “X” esithi abantwana laba ngabokholo lwesipositoli olungavumeli abantwana ukuthi bahlatshwe loba ukuthontiselwa imithi yokubavikela emikhuhlaneni.
Udaba lolu kubikwa luphume ngemva kokuba elinye ilunga lebandla leli ligijimisele abantwana abane esibhedlela sekaroi ababili batholakala belomkhuhlane wendingindi, abanye ababili batholakala belomkhuhlane wamatitiyane.
Ingcwethi zithi abantwana abanengi abokholo lwesipositoli basengozini njengoba bengavumeli ukuhlabisa abantwana.
Ngomnyaka ka 2022 abantwana abedlula ikhulu lengxenye-157, babulawa yilumkhuhlane owahlasela abedlula inkulungwane ezimbili-2,000.
Kumbiko wakhe uMnu Mangwana wazise ukuthi uhulumende usethumele iqula eHurungwe ukuyahlolisisa ngaloludaba kodwa isikhulumeli sogatsha lwezempilakahle uMnu Donald Mujiri utshele iStudio7 ukuthi ubesanda kungena ehofisini ngakho ubengakabi lolwazi olugcweleyo ngaloludaba.
Umgcinisihlalo wekhomithi yephalamende ebona ngezempilakahle uMnu Daniel Molokele utshele iStudio7 ukuthi bazaqhuba umhlangano lomphathintambo wezempilakahle ngaloludaba.
Forum