Lumnyaka wokhetho abancintisayo, uMongameli Joe Biden loMnu. Donald Trump bobabili basebenzisa ulwazi lwalezinsuku lobulembu oluthiwa yi Artificial Intelligence ukuhuga abavoti.
Kumikhankaso edinga ukuhuga abavoti abanengi abaxhasa abezombusazwe, inhlelo zalolulwazi olwe generative artificial intelligence yilo oluzadala umehluko kwezombusazwe.
UMnu. Scott Babwah Brennen owethula imbiko eqondisa amanga awethulwa ngabezombusazwe ekolitshini le University of North Carolina. Ke sizwe ukuthi uthini ngalokhu.
"Ulwazi lwakhona luguquka ngesiqubu. Kukhanya maviki wonke kulenguquko yalolulwazi olusungulwayo olutsha," kutsho u-Brennen.
Lezinhlelo zilobukhali elizweni jikelele lasezigabeni, kutsho ophathisa abezombusazwe, uBetsy Hoover.
Kutsho uHoover: "Nxa ukhangele uzathola ukuthi umkhankaso ongela ngitsho lenhlelo zobulenjini. Kodwa ulwazi lwe AI lubapha ithuba lokuba lenhlelo zobulenjini ezilohlonzinxa befuna. Nxa kuloncintisayo encintisana lomuntu oyabe elemali uhlelo lwe AI lwenza kube lomehluko omkhulu emkhankasweni."
Inkampani ka Hoover iphathisa ibandla le Democratic Party. Uthi ukufundela lolulwazi yikulusebenzisa ngendlela eqondileyo.
"Angazi ukuthi abebandla lama Republicans balemigoqo na yokusebenzisa lolulwazi, kodwa ngiyazi ukuthi abebandla lama Democrats basebenzisa lolulwazi ngobuciko obungaphazamisi umphakathi. Yikho ngisithi asilani ngokusalela emuva kunhlelo ze AI nxa kusitho ukuthi sisebenzisa lolulwazi ngokunanzelela singephuli malungelo,” kutsho u-Hoover.
Ngomnyaka ka 2016, uMnu. Trump wasebenzisa inkundla zokuxhumana ezathumela abantu imlayezo elamabizo lemininigwane yabo esebenza lenkampani yakwele Bhilitane eye Cambridge Analytica eyaqondisa limlayezo ebantwini ibabetha ngamabizo abo lokunye okwenza njengathi bayaziwa.
UMnu. Brad Parscale nguye owakhokhela lumkhankaso engumqondisi wogatsha lwe data and digital operations.
Inkampani yakhe ethiwa, Campaign Nucleus, yiyo eqondisa inkundla yobulumbu bomkhankaso ka Trump walumnyaka.
U-Parscale utshele umhlangano othiwa FreedomFest conference ekuqaleni komnyaka ukuthi uhlelo lwe artificial intelligence luyenelisa ukubuthelela ulwazi lwabavoti lukhankase imilayezo ngama email lama text kulabo abavota bengekho lapho abahlala khona.
“Kuminyaka esanda kudlula kuzakwenzakala ukuthi umuntu enelise ukuqhuba umkhankaso kumakhalekhukwini, ethumela imilayezo kusetshenziswa ulwazi lwe AI,” kutsho uParscale.
Akusiyo mikhankaso nje kuphela. Ucwaningo olwenziwe yi American Press Institute le The Associated Press lutshengisa ukuba abantu abayisilinganiso sokungamatshumi amane lambili bayesabela ukuthi ulwazi lwe artificial intelligence luzsetshenziswa ukwethula izindaba ezingaso zeqiniso ngesikhathi somkhankaso wokhetho.
Forum