Kubikwa ukuba sokulembono eyehlukeneyo kumanyano wamabandla owe Coalition for Democrats (CODE).
Lumanyano ulamabandla abalisa ele People’s Democratic Party, iNational People’s Party, MDC (Ncube), iZapu lamanye afika phose itshumi.
Abanye abakumanyano lo babikwa besola ukulobelana isivumelwano sokusebenzelana esisayinwe nguMnu. Morgan Tsvangirai, umkhokheli weMDC-T, loMnu. Welshman Ncube owecele le MDC besithi uNcube bekumele abazise kuqala.
UTsvangirai wabhodabhoda ilizwe lonke kusukela ekuqaleni komnyaka ebuzisisa abasekeli bebandla ukuthi bayafuna na ukuthi basebenzelane lamanye amabandla.
Ngemva kwemihlangano le abasekeli bebandla babikwa bavumelana ukuthi kusetshenzelwane ukuze kunqotshwe ibandla le Zanu PF.
Kodwa ilunga lePDP, uMnu. Edwin Ndlovu, utshele iStudio 7 ukuthi ibandla lakhe kalilani lenkulumo esiqhamukile kodwa lifuna amabandla wonke asebenze ndawonye ngesikhathi sokhetho oluzakwenziwa ngomnyaka ozayo.
"Thina ibandla lethu sifuna lisebenzelane lamanye amabandla ngoba sibona ukuthi ukuya kukhetho singamanyananga kungabanzima ukunqoba ibandla le Zanu PF," kutsho uNdlovu.
