Inhlanganiso emela ababalisi, iProgressive Teachers Union of Zimbabwe (PTUZ) ithi amapholisa asebenza ensitha aseqalisile ukwethusela iziphathamandla zayo kanye lababalisi phezu kokukhalala kwabo umsebenzi.
Ababalisi abangamalunga enhlanganiso le baqale ukukhalala umsebenzi ekuvulweni kwezikolo ngoLwesibili besithi uhulumende kumele abengezelele iholo njalo ebabhadale imali yabo yama-bonus.
Umkhokheli wePTUZ uMnu Takavafira Zhou wethuselwe ngabacuphi eMasvingo besithi inhlanganiso le kumele yekele ukusetshenziswa ngamabandla aphikisayo ukutshotshozela ababalisi ukuthi bahlamukele uhulumende.
Isiphathamandla salinhlanganiso koBulawayo uMnu Vusumuzi Mahlangu utshele lumsakazo ukuthi abacuphi laba bafikile lasemahofisini abo babaxwayisa ukuthi babuyele emsebenzini.
Kodwa uthi bazimisele ukuqhubeka ngokukhalala umsebenzi kungelani lokwethuselwa lokhu.
