amalinks wokungena

Abantu Abanengi Bathemba uMugabe Okwedlula Amabandla Aphikisa iZanu PF

  • Gibbs Dube

Mongameli Robert Mugabe.

Izizalwane zeZimbabwe eziyisilinganiso esingamatshumi ayisithupha lane ekhulwini (64%), eziphatheke ephenyweni olwenziwe yinhlanganiso ye-Afrobarometer zitshele inhlanganiso le ukuthi ziyamthemba kakhulu umongameli welizwe uRobert Mugabe.

Loluphenyo olusanda kwenziwa lutshengisa ukuthi abantu abayisilinganiso esingamatshumi amathathu lasithupha (36%), njalo beleminyaka engaphezulu kwetshumi lanhlanu, abawathembi amabandla aphikisa elibusayo.

Inhlanganiso le yathola impumela ephosa ifane lale eminyakeni esanda kwedlula.

“Inengi labantu basemaphandleni bayamethemba umongameli welizwe (69%) ukwedlula abasemadolobheni (55%), bakhona abathi bamthemba ‘kancane’ kube labanye njalo abathi bamthemba ‘kakhulu’.

Okumqoka yikuthi abantu laba abaphatheke ephenyweni lolu baveze ukuthi umongameli uthenjwa (64%) ukwedlula ibandla elibusayo, i-Zanu-PF (56%).

Impumela yophenyo lolu, olufinyelele abantu abayinkulungwane lamakhulu amabili (1,200), iphinde yaveza ukuthi ingxenye yezizalwane zeZimbabwe ezileminyaka engaphezu kwetshumi lanhlanu (50%) ziyayithemba ikhomishini ephatha ezokhetho (Zimbabwe Electoral Commission).

Inengi labantu abathemba ikhomishini yokhetho ngabe Masvingo (67%) abathi ‘bayithemba kakhulu’. KoBulawayo kulapho okulabantu abalutshwane kakhulu (28%) abayithembayo ikhomishini.

Uphenyo lolu luphinde lwaveza ukuthi abantu bayazithemba kakhulu inkokheli zamabandla enkolo ezitshiyeneyo (72%), kuthi abayingcosana (32%) yibo abathemba inkokheli zamabandla aphikisayo.

Okunye okuvezwe luphenyo lolu yikuqakatheka kwezinhlanganiso ezizimeleyo zona ezixhasa uhulumende lapho asilela khona. Ukungezwani kuyaphikelela phakathi kukahulumende lalezo eziqhuba umsebenzi ophathelane lezombusazwe, uhulumende uzisola njalonje ethi ziyamlwisa.

Lanxa amabandla aphikisa elibusayo engathenjwa, njalo kulokuxokozela kwamanye, aseqalise umsebenzi wokusebenza ndawonye ekhethweni oluzayo. Ibandla le-MDC-T selilezivumelwano zokusebenza ndawonye lelikaMujuru, i-NPP lele-MDC ekhokhelwa nguWelshman Ncube.

Facebook Forum

XS
SM
MD
LG