Umongameli Barack Obama wele Melika ngoLwesithathu wengeze ngomnyaka izijeziso zenotho ezetheswa umongameli Robert Mugabe, kanye labanye bakhe abasebandleni leZanu PF. Lezi zijeziso zetheswa uMugabe ngomnyaka ka2003 ngowayengumongameli weleMelika ngaleso sikhathi uMnu. George Bush.
Uhulumende weleMelika uthi uthethe leli nyathelo nje, ngoba engathokoziswa ngokwenzakala eZimbabwe okubalisa ukuqhubeka kokwephulwa kwamalungelo abantu, ukungananzwa lokulandelwa kwemithetho yelizwe, ukuhlukuluzwa kukazulu ngabezomvikela okumele babe yibo abavikela uzulu, ukuqhutshwa kokhetho okukhululekileyo abantu bengethuselwa, ukwamukelwa kwempumela yokhetho ngabasembusweni nxa benqotshiwe, ukusebenza kuhle kwamapholisa bengayamelanga cele kanye lobuncindezeli bombuso wentandokayiphikiswa kaMugabe lebandla lakhe.
Abe Zanu PF bayazisola kakhulu lezi zijeziso besithi amazwe angentshonalanga agoqela iMelika azonda uMugabe ngoba ekhululekile ukusola okubi okwenziwa ngamazwe athuthukileyo.
Kodwake ingcwethi zezombusazwe zona ziyamukela ngembono ehlukeneyo inyathelo elithathwa yiMelika ngoba zisithi ngempela amalungelo oluntu ayephulwa eZimbabwe ngakwelinye icele zisithi lezi zijeziso zidalela uzulu makhaza inhlupho hatshi uMugabe labanye bakhe kuphela. Ukuhlaziya lolu daba uPraxedes Jeremiah weStudio Seven uxoxe lengcwethi ecubungula ezombusazwe uMfundisi Useni Sibanda ongumqondisi njalo wenhlanganiso ye Christian Alliance ekoBulawayo, elengccwethi ehlaziya ezenhlalakahle kazulu umnumzana Decent Ngwenya yenake okwele Botswana.
Umqali siziba kulingxoxo uSibanda uthi ngempela uyalisekela leli nyathelo labe Melika. “Laloba kusidalela inhlupho ezithile kodwa iMelika ngokwenza lokhu izama ukubonisa inkokheli yethu ilandele imithetho yelizwe emunyethwe yisisekelo sombuso esazibhalela sona, amapholisa asebenze umsebenzi wabo sibisibili hatshi okwenzakala manje okokuthi umuntu onjengoItai Dzamara uyanyamalala wona etshona egijimisana labalwa impi yenkululeko abazitshengiselayo ngokuthula”.
UNgwenya laye uyavumelana loSibanda kodwa ethi “Yebo ukuthi uhulumende weZimbabwe aguqule ukuphatha akwenza ilizwe kumqotho kodwa lapho kulwiswa ukuguqulwa kwalowo hulumende ngamazwe athuthukileyo, isiphetho yikuba abantu makhaza yibo abathwala nzima, ngabe lawo mazwe adinga ezinye indlela ezingazwisi buhlungu umuntu wonke, ngoba lapho okulwisana indlovu utshani yibo obuthwala nzima”.
