Abatsha bathi uhulumende kabasekeli ekusebenziseni ubuciko bakulenz'insuku okusetshenziswa ubuciko bebulenjini be-Internet obubizwa ngokuthi yi-Artificial Intelligence ekuqhubeni ibhizimusi, ekwethuleni imibiko lokunye okulakho ukuphazamisa impilo kazulu.
Abatsha bathi ngaphandle kokungasekelwa ngokugcweleyo nguhulumende ukuze besebenzise i-Artificial Intelligence, kunzima ukungena ebulenjini beInternet eZimbabwe, ikakhulu uma kuqathaniswa lamanye amazwe emhlubulweni wezansi yezwekazi leAfrica.
U-Obert Dliwayo, okunhlanganiso ye-Young People for Innovation, uthi imali yokungena ebulenjini be-internet kwele Zimbabwe iphezulu kakhulu ngakho-ke kuyahlupha ukusebenzisa i-Artificial Intelligence.
“Kunzima kakhulu ukuba senze ama innovations loba intuthuko kundaba zeinternet kuleli ngenxa yokuba sidinga imali enengi kakhulu ukwenza lokhu nxa kufananiswa lamanye amazwe’’
Lokhu kusekelwe ngomunye osakhulayo owenhlanganiso ye-Youths Shine, uEdward Sibindi, yena othi indleko yokungena ebulenjini be-internet inengi kakhulu okukuthi kayisoze iqakathekiswe inkuthazo kahulumende eyokuba besebenzisa indlela zakulez’insuku.
“Kusuka kube nzima ukuba siphumelelise uVision 2030 kahulumende we Zimbabwe ngoba asenelisi ukusebenzisa ama ICTs ngendubo esibhekane lazo’’
Omunye osakhulayo uSharon Hove uthi kunzima ukuba athenge imitshina yakulez’insuku egoqela ama-computers kanye lama laptops.
“Indaba ze internet zihlupha kakhulu ngoba amalaptops lama phones avele kawathengeki. Singakakhulumi nge internet kunzima ukuba sithole iaccess kuinternet ngoba ungakhangela imitshina sivele kasilayo’’
Osebenza umsebenzi wokwakha amakhasi okuxhumana obizwa ngokuthi yi-web development, uGilbert Nduna, uthi kumele uhulumende azame ukuza lendlela zokwehlisa imali ebhadalwa ngabatsha abasebenzisa imitshina yakulez’insuku.
“Kumele uhulumende aze lama subsidy ikakhulu kundaba ze internet kukhangelwa amabhizimusi afana lawethu asazama ukuthuthuka’’
Uyakhala loGracius Nyathi, osebenzisa ubulembu be-internet ekuthengiseni ama-videos lemifanekiso.
“Thina sisebenzisa internet ukwenza imali sithengisa amavideos ethu. Ukuze uhulumende avuselele amabhizimusi ethu kumele asinikeze internet ethe xaxa’’
Omele ugatsha luka hulumende olwe-Information and Technology, uMnu. Ryan Tshuma, uthi uhulumende uyazazi indubo ezibhekane labatsha. Uthi kulemizamo yokuba abatsha betholiswe indlela zokusebenzisa ubulembu be-Internet ngokwakha ama-Information Centers.
“Uhulumende uyazazi indubo zabatsha kwezemitshina yakulezinsuku. Uhulumende ukhuthaza abatsha ukuba bathathe amathuba okusebenzisa ama Information Centres asendaweni ezehlukeneyo ngoba lokhu sikwenzela ukuba kube ngcono ukusebenzisa ama ICTs’’
: Ekhuluma ngeviki ephelileyo, umsekeli kamongameli, uMnu. Kembo Mohadi, ubike ukuba uhulumende ufuna ukuthi abatsha basebenzise indlela zakulez’insuku ukuze luphumelele uhlelo lukahulumende lokuthuthukisa ilizwe olweVision 2030
Forum