Umongameli Robert Mugabe, ukhuthazwa ukulalela okutshiwo ngabantu beZimbabwe, akhulumisane labalemibono eyehlukanee leyakhe abagoqela umfundisi Ivan Mawarire hatshi ukubahlukuluza.
Lokhu kuphume emhlanganweni lentathelizindaba owenzelwe eMedia Centre, ngabenhlanganiso yabasakhulayo eye Youth Advocacy for Reform and Democracy.
Ekhuluma emhlanganweni munye umkhokheli weYARD, umnumzana Themba Mliswa, uveze isifiso sakhe sokuncintisa ezimele kukhetho lwama By – Elections eNorton.
Lesi sigaba sisele singela mummeli ngemva kokuxotshwa kuZanu PF lakuhulumende, kuka mnumzana,Chris Mutsvangwa. Kodwa uthi uzatshedela eceleni nxa uMutsvangwa engakhetha ukuncintisa ezimele, ezamsekela ukukhankasela lolukhetho.
Uqhubeke ethi uxwayise inkokheli yamazwe akumanyano we European Union ekwethekeleleni kwakhe kiwo, ukuba esule izijeziso zenotho ezetheswa iZimbabwe. Ethi ngoba inkokheli kahulumende weZanu PF ingazinaki lezo zijeziso, kodwa ziqhubeka ngokudala umonakalo elizweni kwezenotho lakwezombusazwe osokubangele ukudubeka komuntu kazana.
Kwaba ngumbono osekelwe ngophethe uhlangothi olubona ngezobudlelwano labamanye amazwe unkosazana Tariro Senderayi.
“Okukhona yikuthi,lingaba lifuna ukuthi abantu,behlale sikhathi lesinye,belokhu besinika imali but imali yankhona ingasebenzi ukuncedisa abantu abadubekayo elizweni,akula nto ancedayo khonapho. Bona bayabe besithi amasanctions kodwa thina siyabe sisithi khona khona indaba ekhona yikuthi nxa kuyindaba yamasanctions,kabake beme ukunika imali yonaleyo okumele incede abantu ,imali yakhona asiyiboni thina abantu esihlala phansi khonale. Ipho nkufika phezulu ,iphelela phezulu khonale,thina esingaphansi, asiyiboni. Singathi amasanctions,ye,asiyali ukuthi akhona, indaba ekhona ngeyokuthi, ngubani oyabe efuna ukubeka imali yakhe,elizweni eselifile. Imali yakhona ayincedisi abantu abadinga uncedo, imali yakhona iphelela phezulu, akuncedi ngalutho khonokho”
Unkosazana Senderayi, uncome inyathelo elithethwe ngabalwa impi yenkululeko ethi njengabontanga bayalisekela, ekhuthaza uzulu ukuthi laye alisekele.
“Besimelele bona ukuthi bakhulume, sebekhulumile. Bona ngama gate keepers ama communities emakhaya. Yibo abathi nxa ama elections esenzakala, bayangena kuma provinces,bekhangele ukuthi abantu nxa bevhota, bavhota njani. Ilizwe alingeke lahamba,lilokhe lihamba, sesidiniwe. So nxa ngikhuluma ngisitsho khonokho, I think ama war vet, ngiyajabula ukuthi sebekhulumile ukuthi sebedubeke kakhulu.
Ontanga beYARD bathi lanxa besekela inyathelo labalwa impi yenkululeko, kababoni uMugabe elalela lokho lanxa kusobala ukuba eselahlekelwe ngamandla wokuqondisa okwenzakala elizweni.
Abalwa impi bamangalise uzulu ngeviki edluleyo, ngophumela egcekeni bethi sebediniwe ngombuso kaMugabe, esetshabalalise umnotho welizwe, sebefuna adedele umsekeli wakhe uMnangagwa angene ebukhosini.
