amalinks wokungena

Breaking News

Abesifazana eZimbabwe Bafuna Ibandla leZanu PF Liphume Embusweni


UNkosikazi Joice Mujuru leyinye inkokheli yamabandla ezombusazwe aphikisa ele Zanu PF basemhlanganweni weWomen's Electoral Convergence.
UNkosikazi Joice Mujuru leyinye inkokheli yamabandla ezombusazwe aphikisa ele Zanu PF basemhlanganweni weWomen's Electoral Convergence.

Abesifazana base Zimbabwe basungule umanyano weWomen Electoral Convergence 2018 (WEC18) ngempelaviki, lapho abaphawule khona umkhankaso we "Hervotewins2018 ".

Lumkhankaso usungulwe ngenjongo yokukhulumisana, ukufundisana lokukhuthazana ukuphatheka kukhetho bencintisa langokuvota ukuze baphatheke ngokugcweleyo kukhetho lomnyaka ozayo.

Bekungabizwa ozwayo emkhosini lo, kuculwa kugiywa abesifazana bekhuthaza ukuba ukhetho oluzayo luka 2018, luqhutshwe ngokuthula, ukwenzela ukususa umbuso kaMongameli Robert Mugabe lebandla lakhe le Zanu PF.

Abalandeli bamabandla atshiyeneyo
Abalandeli bamabandla atshiyeneyo

Obebona ngezokumanyanisa abesifazane, uNkosikazi Priscilla Misihairabwi-Mushonga, weMDC ekhokhelwa nguMnu. Welshman Ncube, uthe kuqakathekile ukusenza ndawonye ngesikhathi sokhetho.

Umgcinisihlalo webandla le People’s Democratic Party ( PDP ), uNkosikazi Lucia Matibenga, laye uthe mhlawumbe zingafezeka izifiso zabesifazana zokungena ezikhundleni zaphezulu nxa ukhetho lungenziwa ngemfanelo.

Umsekeli womkhokheli we MDC T, uNkosazana Thokozani Khuphe, uthe isisekelo sombuso sebandla leMDC T, siyaqakathekisa ukuphatheka kwabesifazana kwezombusazwe.

UNkosazana Thokozani Khupe ukhuluma emhlanganweni weWomen's Electoral Convergence.
UNkosazana Thokozani Khupe ukhuluma emhlanganweni weWomen's Electoral Convergence.

Abaphatheke kumikhankaso yokulwela amalungelo abesifazane, abanjengo Nkosazana Thoko Matshe, baze ukuzasekela lumkhosi.

Bezikhona leziphathamandla ezimela abesifazana asesebatsha ngaphansi komkhankso we #shevote2018, esinye sakhona kunguNkosazana Sibonokuhle Buhlungu.

Unobhala jikelele we MDC T kuhlangothi lwabesifazane, eHarare, uNkosikazi Lindani Moyo, uthe bafunde okunengi kulomhlangano.

UNkosikazi Lucia Matibenga ukhuluma emhlanganweni weWEC18.
UNkosikazi Lucia Matibenga ukhuluma emhlanganweni weWEC18.

Abaqoqe ukuphawulwa komanyano we WEC18, bathi benze lokhu ngemva kokunanzelela ukuba abesifazana yibo abalinani elikhulu elizweni, lababhalisa amagama ukuthola ilungelo lokuvota, kukhangelwa ukhetho luka 2013.

Udaba Esilethulwe NguMavis Gama
please wait

No media source currently available

0:00 0:04:14 0:00

XS
SM
MD
LG