Inhlanganiso ye United Nations Development Programme (UNDP) ngoLwesithathu yethule umbiko okhombisa ukuthi eleZimbabwe ngelinye lamazwe kuzwekazi leAfrica asasalele emuva kakhulu kuntuthuko yabesifazana.
Lumbiko olesihloko esithi Africa Development Report 2016, Accelerating Gender Equality and Women’s Empowerment in Africa, owethulwe ePretoria kwele South Africa, uveza ukuthi abesifazane emazweni amanengi eAfrica batshiywe phandle kwenhlelo zentuthuko.
Ukuhlonitshwa kwamalungelo abesifazana, ukuphiwa kwabo amathuba omsebenzi lokungena kwabo kwezomnotho yizinto ezisasilela kakhulu kuzwekazi le Africa. Amazwe ase zansi yezwekazi le Africa kugoqela iZimbasbwe yiwo asilela kakhulu ngaphandle kweleSouth Africa.
Ngokutsho kwalo umbiko, ngo 2004 abesifazana beZimbabwe abedlula isilinganiso sokungamatshumi amahlanu ekhulwini (53%) bebephila ngemisebenzi yokuzenzela, okulinani eliphezulu kakhulu labantu abangaqatshwanga ngokusemthethweni.
Obona ngenhlelo zentuthuko kwezomnotho enhlanganisweni ye UNDP uNkosikazi Fatou Leigh, uthi kuqakathekile ukuthi amazwe eAfrica abekwazi ukuthi intuthuko engagoqeli abesifazana iyingozi.
“Inengi lamazwe eAfrica lilayo imithetho yokuthuthukisa abesifazana, kodwa uhlupho olukhulu yikuyilandela leyo mithetho.”
UNkosikazi Leigh uthi ukuvalelwa kwabesifazane phandle kwezentuthuko kwenze iAfrica yalahlekelwa ngamadola angamabhiliyoni alikhulu lanhlanu ngo 2014 kuphela.
Umqondisi wenhloso enhlanganisweni elwela amalungelo abesifazana kweleSouth Africa eyeSonke Gender Justice, uMnumnzana Bafana Khumalo, uthi umlandu omkhulu kuthuthuko yabesifazana usezandleni zabasilisa. Uthi kufanele abesilisa babone ukuthi kumankampani abakuwo, kungatsha zikahulumende, ephalamende lezikolweni abesifazana bathola amathuba alingana lawabo.
“Kuyacacisa kahle ukuthi ukulingana ngokobulili kuyinto okusekelwe kuyona impilo siko yethu singabantu ngakhoke kufanele sikwazi ukuthi sigqugquzele uma ngabe sifuna ukuthi impumelelo ibe khona ephakathini yethu.”
Esekhuluma ngodaba oluke lwahlupha eZimbabwe olokulotsholwa lokwendiswa kwabantwana abaleminyaka ephansi kwelitshumi lesithupha, uKhumalo uthi lo ngumkhuba wokuganga okufuze uphele.
Akusakhulunywake ngomkhuba wokuthola obabamkhulu besiya ocasini lamantombazana alingana labazukulu babo, njengoba uKhumalo esithi lokhu lihlazo elicindezela abesifazana kakhulu
“Esikukhohlwayo njengabantu besilisa yikuthi uma ngabe ngihamba ngilala nalengane ezincane umfanami angimzalile uzoganwa ngubani. Angiboni ukuthi yinto enhle. Kufanele sikugweme kakhulu lokho njengabantu besilisa. Sikhuzane.”
Lumbiko ukhuthaza ukuthi amazwe ethule imithetho yokuthuthukisa abesifazana, abeleqiniso lokuthi bakhona ebukhokhelini kungatsha zikahulumende lamankampani azimeleyo, asekele inhlelo zabo zokusungula lokulawula amabhizimusi, lokubumba indlela zokubona ukuthi lezi zinqumo ziyalandelwa kumbe hatshi.