EleZimbabwe limanyana lamanye amazwe womhlaba ukunanza usuku oluqakathekisa imisebenzi yabesifazane olwe International Women’s Day phansi kwesihloko salonyaka esithi Planet 50 - 50 by 2030, step up the Gender Equality.
Abezigodlo zabammeli bamazwe angentshonalanga, inhlanganiso ezikumanyano wamazwe omhlaba, i-United Nations, inhlanganiso ezisebenzelana lozulu kanye lenkokheli kungatsha zikahulumende bamanyane ekunanzeni lolusuku, behamba ngenyawo umango ongamakilometre amahlanu, besuka emahofisini ommeli wakwele Australia, ase Borrowdale.
Abaphatheke kulolohambo bathi benze lokhu ukubonisa inkokheli ukuqakatheka kokuzinikela ukulandela izivumelwano inkokheli zamazwe engena kizo hatshi ukukhuluma nje kuphela kungela manyathelo athathwayo ukuqondisa kwezokungalinganiswa kwamathuba phakathi kwabesilisa labesifazane.
Ubekhona umgcinisihlalo we Commission ebona ngezokulinganiswa kwamathuba phakathi kwabesifazane labesilisa, unkosikazi Margaret Mukahanana Sangarwe.
Umqondisi enhlanganisweni yabesifazane abaphila lobugoga eye Disabled Women Support Organization unkosikazi Rejoice Timire, yena ukhala ngelokuthi beqhubeka bekhohlakala abesifazane abanjengaye kule imikhankaso yokuthuthukiswa kowesifazane elizweni njengokutshiwo ngumhlaba wonke.
Wengeza ethi lanxa sekunganeno kunhlelo zokuthuthukiswa kwabesifazane, kabathuthukiswa ngokufanayo abaphila lobugoga kundaba zokulinganiswa kwamathuba ngoba bona vele betshiywa ngaphandle.
Abesifazane labesilisa abaphatheke kuloluhambo, baze bevelela enhlanganisweni ezitshiyeneyo onjongo yazo kuyikuthuthukiswa kwezokulinganiswa kwamathuba phakathi kwabesilisa labesifazane.
Abaphatheke emkhosini lo bathi kumqoka ukuba uzulu azwisise ukuba umkhankaso wezokulinganiswa kwamathuba phakathi kwabesilisa labesifazane, kungasi daba lwabesifazane kuphela, kodwa kungumthwalo womuntu wonke ukuphatheka kiwo, kusukela emaphandleni.