Inhlanganiso ezisebenzelana labesifazane zithi ukungenela kwabezombusazwe nxxa zifuna ukuqhuba umsebenzi wazo wokusabalalisa ulwazi oluphezu kokuzivikela kugciwane le HIV ngokunye okwenza igcikwane lengculaza lisabalale.
Umbone lo uphume emhlanganweni walezinhlanganiso wokubonisana phezu kokungenziwa ukuzivala izikhenxe ezikhona kumikhankaso yokulwisana legciwane leHIV owenzelwe e Meikles Hotel eHarare, ngokuqoqwa kwabenhlanganiso ye UN Women.
Omunye walabo abakhalaze kakhulu phezu kwalokhu nguNkosikazi Tendayi Westerhof owe Pan African Positive Women Coalition (PAPWC-ZIM).
UNkosikazi Anna Sango we African Young Women ngoxwayisa inkokheli kulenhlanganiso ukuba idinge indlela ezilokuhlakanipha lapho zifisa ukungena kulezo zigaba ezilenkokheli elukhuni.
USango uthi akula enye indlela kulempi yokwehlisa ukumemetheka kwegcikwane lengculaza kuzulu kakhulukazi kuhlangothi lwabesifazane ngaphandle kokusebenzelana.
Inkokheli yenhlanganiso ezisebenzelana labesifazane abagogekileyo yona ikhala ngelokuthi lokhu kwenza kusuka kuphazamise loluhlangothi ngokuphindiweyo.
Umkhokheli wenhlanganiso ye Disability Women Support Organisation, unkosikazi Rejoice Timire, ohamba ngenqola ye wheel chair, uthi lesi simo sisuka siphazamise abanjengaye ngokuphindiweyo njengoba behlezi betshiywa ngaphandle.
UNkosikazi Timire ukhuthaze inkokheli yezombusazwe yonke ukuba yehlukane lomkhuba wokuba lukhuni lapho abenhlanganiso ezisebenzelana labesifazane zizama ukungena ezigabeni ukuthi zisabalalise ulwazi lwegciwane lengculaza.
Lezinhlanganiso ziyakhalaza ukuba zitholiswe usizo lwemali, zenelise ukuqhuba umsebenzi ngendlela ekusibanga esiphezulu ukuze ziphathise wonke umuntu elizweni, ikakhulukazi abesifazane.