Sokusungululwe umanyano wabamabandla okholo esigabeni seNorton osebenzelana lamalunga azancintisa kukhetho lwama by-election kulandela ukuqhamuka kodlakela phambilini kokhetho oluzoqhutshwa kuleso sigaba ngenyanga ezayo.
Inkokheli yalumanyano othiwa Norton Voice of Hope (NVH), ithi ithethe lelinyathelo ngenjongo yokwenzela ukuqhutshwa kokhetho oluzayo ngokuthula kusukela kumalungiselelo alo, ngosuku lokuvhota kanye lalapho kusethulwa impumela kuze kwazakale ukuba ngubani onqobileyo.
Ukhetho lokudinga ozamela isigaba seNorton edale lephalamende luqutshwa ngemva kokuxotshwa ebandleni le Zanu PF kobemela lesi sigaba, uMnu. Christopher Mutsvangwa, umkhokheli wabalwa impi yenkululeko, iZimbabwe National Liberation War Veterans Association.
Abathathu abazancintisa nguMnu. Themba Mliswa oncintisa ezimele (independent candidate), uMnu. David Chingodzo weNational Constitutional Assembly (NCA) kanye loMnu. Ronald Chindedza owe Zanu PF.
Umgcinisihlalo wenhlanganisweni yeNVH, uProphet Wilbert Chandamale, owe Gospel of Peace, utshele intathelizindaba ukuba bazasebenzelana labancintisana kulolukhetho, ukukhankasela ukuthula, lwehle lolo dlakela, ngesikhathi kulungiselelelwa lolukhetho.
Umfundisi Taurai Vandira we Celebration Church, uthi abasafuni kuzwa ngezehlakalo zodlakela esigabeni seNorton.
Lelinyathelo linconywe ngabenhlanganiso eziphatheka kwezokukhankasela ukuthula elizweni, eye Zimbabwe Peace Project (ZPP).
Osebenza ekuhlangothi olubona ngezokutholisa uzulu ulwazi kunhlanganiso ye ZPP, uNkosazana Nokholo Mhluzane, uthi abenhlanganiso yakhe bayasekela wonke oqhuba imisebenzi yokukhankasela ukuthula lokulondolozwa kwamalungelo abo.
UMaMhluzane uthi abafundisi kumele bakhankasele ukuthula kungakhathalekile ukuba umuntu ungowaliphi ibandla.
Uthi abafundisi abasebenza ngendlela yokumanyanisa uzulu yibo okumele basekelwe ngazo zonke indlela, besenza ukuba azwisise uzulu ukuba singekho isizatho sokuhlukuluzana kusetshenziswa udlakela.
Abe NVH laba bathi bazoqhubeka bezikhuluma lezondaba eziphambana lombhalo kaNkulunkulu ngoba kuyikho okuvele bekwenza njengokufunwa lubizo lwabo, ukukhuthaza ukuthandana kwabantu.
Abafundisi abakulomanyano bavela kumabandla ehlukeneyo atholakala eNorton okubalisa, eye United African Apostolic Church,Christ Embassy,United Churches of Christ lamanye.