Abomanyano wamalunga enhlanganiso yePlatform of Concerned Citizens- PCC, bathi isimo esiselizweni, sesidinga ukubunjwa kobukhokheli obuzaphatha intambo zombuso, phansi kwe National Transitional Authority, ngenjongo yokulungisisa inking ezibhekane lelizwe okungavimba ukuqhamuka kodlakela, anduba kwenziwe ukhetho olungaletha inguquko elizweni.
Emhlanganweni lentathelizindaba. owenzelwe eMedia Centre, wokwethulwa kwalomanyano kuzulu, omunye wamalunga awo, uDr Ibbo Mandaza, uthe kumqoka ukuba labo abazokhethwa ukungena kuqula labazaphatha umbuso okwesikhatshana, kube ngabantu abamsulwa, abengela bandla abalilandelayo.
UMlondolozi Ndlovu, ngomunye wabakade bekhona emhlanganweni lo. UNdlovu wamukele ngenjabulo umcabango wabe NTA, wokulungisisa isimo esiselizweni ngale indlela.
Akufisayo uNdlovu, uthi kube ngumcabango osekelwa nguzulu, wonke jikelele hatshi ihlekana lalabo abazithi bafundile.
Kwaba ngumbono osekelwe ngomunye oyisakhamuzi emzini we Greencroft, umnumzana Desire Tshuma.
Iqula lamalunga ePlatform for Concerned Citizens, bathi injongo yabo yikukhankasela ukuthathwa kwamanyathelo okumanyanisa ilizwe okuzaphathisa inhlalakahle kazulu, ukunanzwa kwamalungelo oluntu kanye lokulondolozwa kwenotho yelizwe egoqela imvelo labantu abazingcwethi emisebenzini ehlukeneyo ukuze bengabi bephuma elizweni besiyathuthukisa amanwe amazwe.
