amalinks wokungena

Breaking News

Akujeziswe Abaqondisi be GMB Abayekele Umumbu Ubola Eziphaleni Zelizwe


Uhulumende uthi kumele kujeziswe abaqondisi be Grain Marketing Board (GMB) abayekela umumbu oyisilinganiso sama tonnes azinkulungwane ezinhlanu wabola eziphaleni zelizwe ezisendaweni ezitshiyeneyo eZimbabwe.

Umnu. Seiso Moyo umphathintambo kahulumende obona ngezokulima uthi kuyamangalisa ukuthi umumbu lo owathengwa kubalimi nyakenye ngamakhulu amabili lamatshumi ayisitshiyangalombili lanhhlanu amadollar eMelika kusilinganiso se tonne kumele uthengiselwe abafuya inkomo.

Umnu. Moyo uthi lumumbu osokumele uthengiswe ngekhulu lamatshumi ayisikhombisa lanhlanu amadollar eMelika bekumele udliwe ngabantu makhaza abalambayo endaweni ezingelazulu lonyaka ezinjenge Matabeleland, Midlands, Manicaland kanye le Masvingo.

Uphinde wathi kumele kuhlolisiswe iziphala lezi nguhulumende engakajezisi abaqondisi be GMB labanye babo abehluleke ukugcina ukudla kwesizwe ngemfanelo.

Iziphala ezilomumbu obolileyo zise Concession, Lions Den, Chiweshe le Aspindale duzane le Harare.

Lokhu kwenzakala ngesikhathi uhulumende esanda kwethula umbiko wokuthi silutshwana isivuno somumbu esizatholakala endaweni ezinengi eZimbabwe ngenxa yokuswelakala kwezulu.

Umnu. Moyo uthi okwenziwe yi GMB kwephula inhliziyo.

XS
SM
MD
LG