Amadamu lapho izakhamizi zedolobho lakoBulawayo athola khona amanzi asewomile kakhulu njalo ikhansili yedolobholeli isikhuthaze uhulumende ukuba aqede ukwakha idamu leGwayi-Shangani ukuze udubo lokusilela kwamanzi luphele.
Ekhuluma lomsakazo weStudio 7 edamu leMtshabezi ngoLwezine ngemva kokubhoda labonozindaba lamakhansila kumadamu atholisa uBulawayo amanzi, umanjinela wekhansili yakoBulawayo, uMnu. Simela Dube, ukhuthaze uzulu ukuba alondoloze amanzi ukuze amanzi akhona abaqhube okwamalanga ambalwa ngesikhathi kukhangelelwe ukuna kwezulu.
UDube ungezelele esithi olunye uhlupho ababhekane lalo ngolokuthi inkampani etholisa uzulu amandla kagesti ilakho ukubacitshela amandla la mahlayana okudala ukuba behluleke ukudonsa amanzi asuka emadamu kumbe lapho abawagcina khona. Uthi njalo kungcono uhulumende azame ngamandla akhe onke aqede ukwakha idamu leGwayi-Shangani ukuze udubo lukaBulawayo luphele.
Omunye njalo umanjinela wekhansili, uNkosikazi Mercy Ncube uchaze ukuba isilinganiso samanzi siphansi kakhulu njalo sebelinde ukuba izulu line kahle.
Omele umabhalane wedolobho lakoBulawayo, uMnu. Mckenzie Moyo, laye uchaze ukuba isimo samadamu sibi kakhulu ngakho uzulu kumele alondoloze amanzi.
Uthe ikhansili lokhe isebenzelana leZimbabwe National Water Authority laye uthe amanzi aseMtshabezi Dam alakho ukunceda uBulawayo okomnyaka.
Ukhansila weNketa 25, uMnu. Mzamo Dube, uthe isimo samanzi sibi kakhulu njalo ucele ukuba izakhamizi zibelokuzwisisa uma ikhansili ibaphungulela amanzi.
Ukusilela kwamanzi kuqhubekela phambili edolobheni lakoBulawayo lapho abantu asebephila khona ngokukha amanzi ezikotshweni zekhansili eziduze lemizi yabo ngoba impompi zamanzi sezihlala zivalwe okwamalanga amathathu ngeviki.
Amadamu awome qha awala manzi izifuyo lenyamazana sezinatha emadakeni ezigabeni seMaNdebeleni.
