Amabandla alitshumi lasitshiyagalombili aphikisayo eZimbabwe avumelana ukuba umanyano kumele ube khona njalo ususeduze. Lokhu kuza ngesikhathi amabandla la, elungiselela ukufola ukukhankasela inguquko emithethweni yezokhetho.
Lokhu kuvezwe ngabakumanyano we National Electoral Reforms Agenda – NERA lowe Coalition of Democrates - CODE, emhlanganweni wokulungiselela umkhosi wokufola okuqoqa ukwenziwa mhlaka 26 Ncwabakazi, owenzelwe eRockwood Christian Centre, esemzini weHatfield eHarare ngoMvulo.
Lokhu kutshengisela ngokwakuqala embalini yelizwe, ukuqhutshwa ngabamabamandla aphikisayo emanyene, nganjongo yinye.
Ayakhalaza phezu kwesimo semithetho elawula ezokhetho njalo efuna inhlanganiso ebona ngezokuqhutshwa kokhethyo ye Zimbabwe Electoral Commission – ZEC isebenze izimele.
Omunye walezi nkokheli, umnumzana Rodney Takaruza, weTransform Zimbabwe uthi bakubone kumqoka ukuba bamanyane. Ethi khona bezohlala phansi bexoxisana phezu kokubunjwa kwalomanyano, ngemva kokutshengisela okukhangelelwe ukwenziwa ngoLwesihlanu.
Abamabandla la, bathi bazoqhubeka ngokufola lanxa belokhe bengakayitholi impendulo yamapholisa. Bemelele ukuthi amapholisa engabavimba, bazahle balukhweze udaba lwabo edale laphezulu eleHigh Court.
