amalinks wokungena

Amabhanga Aphelelwa Yimali YamaBond Notes


Imali yohlobo lwama bond notes eqalise ukusebenza ngoMvulo.

Imali yohlobo lwama bond notes eqalise ukusebenza ngoMvulo.

Amabhanga eZimbabwe abikwa esephelelwe yimali yohlobo lwama bond notes, kungekedluli iviki eyethulwe ngoMvulo libhanga elikhulu lesizwe eleReserve Bank of Zimbabwe (RBZ).

Ekhuluma leStudio 7 ngemva komhlangano lezakhamizi kunye labasakhulayo bakoBulawayo oqoqwe yinhlanganiso yeBulawayo Residents Association leNational Youth Development Trust, umsekeli kasibalukhulu weRBZ uMnu. Khuphukile Mlambo, uthe amabhanga asephelelwe ngama bond notes ngakho asicela eyinye imali le.

Uthe kulemali yama bond notes efika izigidi ezilitshumi lambili - $12 million. Ugcizelele esithi kabakafuni ukuthi badinde eyinye njalo imali efanayo.

Uqhubeke esithi abemaphandleni labosomabhizimusi basebenzisa ama bond notes, ama Rand lePula leBotswana.

Uphinde wathi labo abathenga idollar leMelika ngama bond notes kubosiphatheleni koBulawayo ababekwazi ukuthi bayaqilwa ngoba basuka lapho baye banker leyomali bathole inzuzo.

UMlambo uthe baphakathi kokukhulumisana lamabhanga wonke eZimbabwe ngendleko ebakhona lapho abantu bethatha kumbe begcinisa imali yabo ebhanga ngoba iphezulu kakhulu.

Uthe uyajabula ngoba isilinganiso somthelo ozalwa yileyo ebolekwa emabhanga sesehlile uma kuqathaniswa leminyaka edluleyo.

UMnu. Langelihle Sibanda ohlela kuWard 14 koBulawayo utshengise ukukhathazeka ngokuswelakala kwama bond notes emabhanga ngesikhathi bekhangelele ukuhola.

Osakhulayo, uMnu. Stanley Moyo, ubike ukuba ama bond notes kabaletheli lutho njengesizwe.

Inengi labantu elingene lumhlangano likhale ngokuthi abatholi mali ebhanga njalo imali isitholakala emkambo wemali ongaphandle komthetho.

Bekusiba nzima kwesinye isikhathi ukuba uDr. Mlambo akhulume ngoba abantu kade bekhonona betshengisela ukungathokozi ngemali yamabond.

Ukusilela kwemali kuqhubekela phambili edolobheni lakoBulawayo njalo indwendwe emabhanga ziyakhula abantu batshona belindile kodwa akulamali abayitholayo, labo abalenhlanhla baphiwa amadola angamatshumi amahlanu ngelanga kumbe amabond angamatshumi amahlanu.

XS
SM
MD
LG