Mhlaka 9 Mbimbitho intathelizindaba uItai Dzamara ophatheke kwezokulwela amalungelo oluntu, ufikise umnyaka owodwa enyamalele, ngemva kokuthunjwa ngabantu abangaziwayo.
Abenhlanganiso ezilwela amalungelo oluntu labamabandla aphikisayo, abablisa umkhokheli webandla le MDC-T, uMnu. Morgan Tsvangirai, babuthene bafola ezitaladeni zeHarare betshengisela ukunanza ukufikisa umnyaka uDzamara enyamalele.
Imbuzo ephumayo eminengi ngethi kambe amapholisa ayenza umsebenzi wabo ngempela na? Amapholisa abengafuni ukuthi kube lokufola lokhu okubangele ukuthi amalunga enhlanganiso kaDzamara eye Occupy Africa Unity Square baye emthethwandaba ukuyadinga imvumo yokungena ezitaladeni bayiphiwa.
Ukuhlaziya lolu daba umsakazo weStudio Seven uxoxe lomqondisi wenhlanganiso elwela amalungelo kazulu eye Zimbabwe Peace Project, uNkosazana Jestina Mukoko owake wathunjwa laye wanyamalala waze watholakala ngemva kwenyanga ezimbalwa kanye lesiphathamandla sebandla lezombusazwe eliphikisayo ele Zapu uMnu. Mjobisa Noko.
"Angikholwa ukuthi amapholisa ayenza umsebenzi wabo njengalokho abakhangelelwe ukukwenza. Bebemele banikeze uzulu ngemva kwamaviki amabili, ngasebenelise ukukwenza ukudinga u-Itai njengalokho abalaywe ngumthethwandaba ukuthi akwenze", kutsho uMukoko.
UNoko yena uthi "Thina njengeZapu sesikubonile ukuthi uhulumende akafaki enough effort yokumdinga lujaha. Njalo kumele abantu babe kwazi ukuthi apart from uDzamara zinengi ezinye izehlakalo uhulumende angazihluphi ngazo, ezinjengodaba lweGukurahundi, indaba zokuhlukunyezwa kwabantu ludlakela owaba khona ngo2008 lokunye okunengi"
