Ngesikhathi eleBotswana lilungiselela ukuthakazelela iminyaka engamatshumi amahlanu lizibusa, abeZimbabwe abangena kulelo lizwe okungekho emthethweni bathi akula abangakujabulela ngaleli langa ngemva kokuba amapholisa esungule umkhankaso wokubabuyisela enkangaleni esekhaya.
Izitalada ezinengi, ikakhulu edolobheni leGaborone zigcwele amapholisa okufinyeza amathuba alabo abangalamaphepha okuthi bakhululeke.
Inengi labeZimbabwe abangalamaphepha basebenza ezindlini, ekwakheni kanye lokuma ezitaladeni bedinga imsebenzi, kodwa okwakhethesi imamba kayiyelulukanga ngakho lobucakide abuchelesanga.
IBotswana ilungiselela ukuthakazelela iminyaka engamatshumi amahlanu izibusa mhla ziku 30 kuMpandula, ngakho amapholisa aseqale umkhankaso wokubamba abangalamaphepha wokuhlala elizweni.
UNkosikazi Ireen Ndlovu yena ohlala eGaborone uthi lesi, njengamanye amakhefu eBotswana, yisikhathi esizima kubo abangalamaphepha…
"KweleBotswana kunzima kulezinsuku ngoba bakhangele ukuthakazelela uzibuse … AbeZimbabwe bayababamba baba buyisele emuva ngesikhathi lesi."
Kukanti osakhulayo njalo ephila ngokubamba bamba lapha la laphayana, uDumezweni Banda, uthi akuthambanga kubo…
"Lesi yisikhathi esingathambanga kithi esingelamaphepha, bayamisa lemitshova, basidinge phansi phezulu, bangakuthola bayakubuyisela emuva."
Kukanti oseBotswana okusemthethweni, uNkosazana Sipho Dube, uthi bakhala labanye babo ngoba bekwazi abangena kikho uma bebuyiselwa emuva…
"Siyabazwela njalo siyazwisisa abangena kukho ngesikhathi odadewethu labafowethu bebuyiselwa emuva."
Amapholisa angena kakhulu indawo ezaziwa ukuthi zihlala abeZimbabwe, kodwa impi yabo bacina belahlekelwe ngoba ababuyiselwa emuva baphindela ngokuphazima kweso.
UMongameli Ian Khama Seretse Khama, osanda kukhuthaza uMongameli Robert Mugabe ukuthi asuke embusweni, uthi ilizwe lakhe lithwele nzima ngenani elithululeka livela eZimbabwe lingena okungekho emthethweni.
IBotswana isebenzisa izigidi lezigidi ngomnyaka ukubuyisela emuva abangena okungekho emthethweni, njalo kukhanya akulantshitsho olubuyayo, ngesikhathi iZimbabwe igalula kungxaki zomumo womnotho.