amalinks wokungena

'Ababaleka Kubutho eZimbabwe Babulala Abantu eSouth Africa'

  • Bennedict Nhlapho

UMnu. Fikile Mbalula.

Umphathintambo wogatsha lwezamapholisa kwele South Africa, uMnu. Fikile Mbalula, uthi amasotsha eZimbabwe abaleke kubutho adala amacala ayesabekayo kweleSouth Africa. UMbalula uthi banengi asebebotshiwe kanti njalo bakhona abanye okusalandelwa umkhondo wabo.

Ekhuluma labezindaba ePretoria ngohlelo lwakhe lokulwisa ubugangi kwele South Africa, uMbalula uthe ukhathazekile kakhulu ngamasotsha abaleka eZimbabwe ezodala amacala kuleli.

“Kulabantu abachapha umngcele bevela eZimbabwe bebalekile kubutho besebefika lapha bedala amacala. Leli liqiniso. Lifuna ngilitshele ubani? Ngiyalitshela khathesi kulababekubutho eZimbabwe abakuleli ilizwe abagqekeza emabanga besenza ukuganga. Babalekela uMugabe elizweni labo.”

Sokulezehlakalo ezinengi zezizalwane zeZimbabwe esezibotshiwe kwele South Africa zisetheswa amacala abalisa ukweba, ukubulala lokunye okuhambelana lobudlwangudlwangu.

Lobakunjalo, inkulumo kaMbalula isilethe ukungunguna kuzizalwane zeZimbabwe kweleSouth Africa. Umbiko owethulelwe iphephandaba lebulenjini eleAfrican News Agency, iwofisi yomeli weZimbabwe kweleSouth Africa ithi kuyadanisa ukuthi umphathintambo Mbalula wethule lumbiko kungelabufakazi obugcweleyo.

Abanye-ke bathi inkulumo kaMbalula ilakho ukubayinhlansi engabangela ixenophobia. Umgcinisihlalo wenhlanganiso ye Zimbabwe Community in South Africa, uMnu. Ngqabutho Mabhena, uthi kuyingozi ukwethula inkulumo efana lekaMbalula kungelabufakazi obubambekayo.

Kodwa-ke uMnu. Mbalula uthi ulabo ubufakazi obugcweleyo ngenkulumo yakhe.

“Izigangi ezibulele ipholisa uSibiya sizibambile ezimbili zilemibhobho engekho emthethweni … Zilamanye amacala amanengi. Izigangi ezantshontsha esitolo sendandato eHyde Park, sizibambile ezinhlanu. Zonke zivela eZimbabwe, yizizalwane zeZimbabwe.”

Ngokomthetho weZimbabwe umuntu ongene kubutho akulula ukuthi aphume kungelasizatho esibambakayo. Inengi-ke likhetha ukubaleka lisesaba ukubotshwa ngokuphuma kungelasizatho. Lobanje bakhona abanye ababaleke baya kweleSouth Africa, inengi lithi akulunganga ukwenza sengathi yibo bonke abafika kuleli badale amacala.

Facebook Forum

XS
SM
MD
LG