Amazwe angentshonalanga abalisa eleMelika, eleBhilithani leleCanada ngoLwesihlanu achothoze uhulumende weZanu PF ngokutshaya uzulu otshengiselayo ngokuthula.
Embikweni ehlukeneyo, izigodlo zamazwe womathathu eZimbabwe zithe zikhathazekile ngodlakela amapholisa ahlangabeza ngayo abatshengiselayo besola umbuso kaMongameli Mugabe.
Zithi okwenziwa ngamapholisa lokhu yikwephula amalungelo oluntu kanye lesisekelo sombuso esitsha, sona esivumela abantu ukutshengisela.
Izigodlo lezi zixwayise njalo uzulu ukuthi atshengisele ngokuthula, engaze aphatheka kumisebenzi yodlakela.
“Sikhuthaza umuntu wonke, okugoqela abatshengiselayo labagcini bomthetho ukuthi bengaze baphatheka kudlakela kumbe ukwethusela. Udlakela lubi,” kutsho isigodlo seMelika.
Umbiko lo ulandele udlakela oluqhamuke eHarare phakathi kwamapholisa labamabandla aphikisayo ekade betshengisela ngemva kokuba abamabandla laba behlaselwe ngamapholisa.
Isigodlo seCanada laso sigcizelele umbiko weMelika sisithi kumele kube lokukhulumisana kuhle ngokuhluphayo eZimbabwe kungeladlakela.
Ingcwethi kwezombusazwe uMnu Nkululeko Sibanda utshayele amazwe la ihlombe ngokusola ubudlwangudlwangu bamapholisa encedisana labasekeli beZanu PF.
