Sekulabantu abanengi eZimbabwe abalomkhuhlane wetshukela le-high blood pressure, okuthiwa kubangwa yikuguqula impilo okugoqela ukudla okucholekileyo njalo lokungeluli imizimba ngemfanelo.
Uhulumende weZimbabwe okwamanje ubhekane lodubo lwabantu abanengi abasakhulayo labadala abalomkhuhlane wetshukela le-high blood pressure. Izibhedlela zikahulumende ziyehluleka ukunika izigulane imithi yokwelapha imikhuhlane le okwenza bezithengele amaphilisi endaweni ezithengisa imithi.
Isakhamuzi seTshabalala koBulawayo, uNkosikazi Cathrine Manga, uthi ulomkhuhlane wetshukela, owe-high blood pressure kanye lowamathambo.
"Ngenyanga ngiyazithengela amaphilisi etshukela leBP ngamadola eMelika alitshumi lasithupa uma sengithenga lowamathambo kubangamadola angamatshumi amabili lanhlanu. Amaphilisi lawa ngiwathenga nyaangazonke."
Esinye njalo isakhamuzi sakoBulawayo, uNkosikazi Agnes Ndlovu, uthi laye ulemikhuhlane efana xathu leka Nkosikazi Manga.
"Ngilemikhuhlane eminengi engayihlolwa ngodokotela ngaqala ukulandela indlela zokuphila lale imikhuhlane ngoba ayelapheki kodwa kumele unanzelele ukudla okudlayo lokwelula amathambo. Mina okwamanje nginatha imithi yeChina lokudla ukudla kwesintu njalo loba ngigula kunganeno."
Osakhulayo uNkosazana Silindele Ncube uthi usanda kubanjwa umkhuhlane wetshukela.
"Ngagula ngaya esibhedlela sengisiba lesiyezi ngatholakala ngilomkhuhlane wetshukela okwamanje senginatha amaphilisi njalo ngiyazithengelea kanye lokuzihlola itshukela emzimbeni ukuze lihlale lilingene lingabiphezulu kumbe phaansi kakhulu." Ingcwethi kwezempilakahle zikhuthaza uzulu ukuba elondoloze ukuhlanzeka, ukudla kuhle lokwelula imizimba sikhathi sonke. Eyinye yengcwethi lezi nguSikhwicamfundo Solwayo Ngwenya osebenza eMpilo General Hospital. Lapha ukhuluma ezimele.
"Inengi labantu seligula umkhuhlane wetshukela ngoba badla ukudla okungakhi umzimba kuthi isitho somzimba esibucuza itshukela emzimbeni sicine sesisehluleka ukuyibucuza isigijima legazi ikhulela umzimba."
UNgwenya uthi okunye okwenza abantu bebanjwe yimikhuhlane le yikudla ukudla okungakhi imizimba.
"Emhlabeni jikelele abantu sebesidla ukudla okubgakhi umzimba bengazeluli imizimba icine isimkhulu igazi lingasagijimi ngebdlela emzimbeni. "
Akwaziwa ukuba bangaki abantu kwele Zimbabwe abalemikhuhlane le. Inhlanganiso yeWorld Health Organization ithi kusukela ngomnyaka ka1990 kusiyafika umnyaka ka2019 inani labantu abalomkhuhlane we-high blood pressure lakhuphuka lisuka kuzigidi ezingamakhulu ayisithupha lengxenye – 650 million layafika phose ibhiliyoni lengxenye – 1,3 billion.
Inhlanganiso le ithi lomkhuhlane wetshukela lawo usuhluphile emhlabeni wonke jikelele, ikakhulu emazweni aswelayo okulabantu abedlula izigidi ezingamakhulu amane – 422 million abalesifo lesi. Ithi abantu abayisigidi lengxenye – 1,5 million babulawa ngomkhuhlane wetshukela ngomnyaka ka2019 emhlabeni wonke jikelele.
Forum