amalinks wokungena

Breaking News

Bathenga Amafutha Emota eBotswana Bangene Lawo Ngudlu eZimbabwe


Amapholisa kwele Botswana athi sokulokuqonga kwamacala abantu beZimbabwe abathwala amafutha ezimota ngundlu beseqa lawo umngcele ngokuquma ucingo bencedisana labe Botswana.

Amapholisa athi abantu laba abesabi ingozi yamafutha ezimota wona angaphuzi ukubamba ilangabi.

Lokhu kwenzakala ngesikhathi intengo yamafutha okuhambisa izimota iqhubeka iphezulu eZimbabwe uma kuqhathaniswa lathengiswa leBotswana. Abanye bazithola bekubhizimusi engekho emthethweni eyokuwangenisa elizweni ngudlu.

Amapholisa eBotswana athi kulendawo zomgcele lapho ucingo oseluqunywe khona njalo kukhanya engani sokuyiyo indlela yokukhipha amafutha ezimota, ikakhulu iphethulo esetshenziswa eZimbabwe.

UMnu. Gaolathe Ngayaya, isikhulumi samapholisa eMasunga, duze lomngcele weZimbabwe, utshele intathelizindaba ukuthi bayakhathazeka ngokukhuphuka kwamacala okukhipha amafutha ezimota ngundlu.

Bathi ngaphandle kokuthi kulicala ukuhamba lamafutha ezimota mkoto, alakho ukulumatha ngesiphangi phangi adale ingozi efana lokufa.

UMnu. Andreas Mpofu uthi noma abantu bebhekane lobunzima bomumo womnotho, akumelanga belahlele impilo yabo engozini.

“Akumelanga ukuthi abantu bangene kusimo sokuthi bafake impilo yabo engozini … Siyakwazi ukuthi amafutha ezimota alakho ukulumatha ngokuphazima kwelihlo ngakho kumele aphathwe ngonanzelelo.”

Omunye okubhizimusi lokuthengisa amafutha ephethulo uthi bafuqwa yimthelo ofunwa ngababutha imali yesikhwama sikahulumende yeZimbabwe Revenue Authority (ZIMRA) ukuthi basebenzise iganga.

"Kunzima. Amafutha emota yiwo esiphila ngawo … Singena iganga ngoba bafuna (ZIMRA) ukusihlawulisa emngceleni kumbe ukuthi ube lencwadi ekuvumela ukuyithenga inengi."

Amapholisa athi athola amafutha emota etshiywe egangeni duze lomgceleni. Lonyaka kuphela sebethole edlula azinkulungwane ezinhlanu zama litres - 5,000 litres.

AbeBotswana kanye labeZimbabwe bayancedisana kubhizimusi le, amapholisa esithi aBatswana yibo abathwalela abeZimbabwe amafutha ngezimota zabo.

Umnunzana Ngocha Habangana, induna eMapoka, esinye isigaba duze lomngcele weZimbabwe, uthi kulentsha esigabeni engolova ngakho isithole umsebenzi incedisa abeZimbabwe ukudlulisa amafutha emote bethola imbadalo.

XS
SM
MD
LG