NgoMvulo umhlaba uthakazelela ilanga lezisebenzi kodwa koBulawayo kade kungenjalo. Amankampani amanengi avalwa, abantu abalamisebenzi kuthi labo abenelisayo sebephila ngokuthengisa okwenza ilanga lezisebenzi libe lilanga lansukuzonke.
Inengi labantu belingekho koBulawayo ngoMvulo lobanje izitolo phose zonke bezivuliwe ngaphandle kwamabhanga lamawofisi kahulumende.
Inengi labantu seliphila ngokuthengisa kuthi labo abasebenzayo labo babhekane lodubo lokusilela kwemali emabhanga, abanye njalo abaholi osekutshiye ilizwe lilabantu abambalwa abasebenzayo.
Lokhu kubangela ukuba kungabi lemithimba yokuthakazelela ilanga labasebenzayo, ngitsho lombuthano wezisebenzi owawuvame ukwenziwa minyaka yonke egcekeni le Stanley Hall kumbe eWhite Cuty Stadium.
Osakhulayo othengisa amaluba eCity Hall, uMnunzana Godknows Mpala, uthe ilanga lezisebenzi alisacaci njalo lamuhla ibhizimusi lakhe beliphansi.
UMongameli webandla eliphikisayo ele Alliance for National Salvation, uMnu. Moses-Mzila Ndlovu, uthe yinhlamba ukukhuluma ngelanga lezisebenzi.
UMzila Ndlovu uthe abasebenzayo badlela evalweni ngoba bengazi ukuthi bazabuyela kusasa bayesebenza kumbe bathole iholo labo.
Inengi labantu likhala ngokusilela kwemali okwenza balale phandle kwamabhanga.
Isikhulumeli sebandla le Mthwakazi Republic Party, uMnu. Mbonisi Gumbo, ugcizelele amazwi kaMzila Ndlovu esithi balokudana okukhulu ngelanga lalamhlanje ngoba kulokukhala okukhulu koBulawayo ngenxa yamankampani avala amafekithalei ayewavula eHarare.
Isikhulumeli seZAPU, uMnu. Iphithule Maphosa, laye utshaye ukhulume okufanayo esithi amhlophe kulabo abasebenzayo lanxa eZimbabwe lokhu sokulilanga elingasatsho lutho ngoba ukusebenza akusaziwa ngaphandle kokungena ibandla leZANU-PF uphiwe imali uqale ukuthengisa.
UMaphosa uthe umbuso okhona sowatshabalalisa ilungelo lezisebenzi.
UNkosikazi Silethemba Mathe, olwela amalungelo abesifazana, uthe ilanga lezisebenzi selifana lamalanga wonke nanku amavinkili avuliwe ngaphandle kwamabhanga ngoba balutshwana abantu asebeqhatshiwe.
Uthe inengi ngabantu abazisebenzayo bengavala amabhizimusi bazaswela ingcosana ethi akusafani lensuku ezidlulileyo.
