amalinks wokungena

IBotswana Isixotsha Izizalwane zeZimbabwe Ezihlala eDukwi Camp

  • Martin Ngwenya

EleBotswana liphakathi kokukhulumisana leleZimbabwe ukuthi liqalise ukubuyisela emuva abeZimbabwe abangamakhulu phose ayisikhombisa abayiziphepheli kweleBotswana.

Lokhu kulandela ukuphungulwa kwemali yinhlanganiso encedisa iziphepheli emhlabeni jikelele eye United Nations High Commission for Refugees.

Okwamanje kulabantu beZimbabwe phose abangamakhulu ayisikhombisa -688, abayiziphepheli eBotswana. Umphathintambo obona ngezomvikela eBotswana, uMnu. Shaw Kgathi, uthi isikhathi sabo sesitshayile.

Ekhuluma edale lephalamende, uKgathi uthe inhlanganiso encedisa amazwe ngendleko zeziphepheli eyeUnited Nations High Commission for Refugees (UNHCR) izamisa uncedo lwayo lonyaka. Uthe lokhu kutsho ukuthi uhulumende nguye okumele akhiphe imali esikhwameni sakhe ukwenzela ukugcina iziphepheli kodwa lokhu akungeke kweneliseke.

Ngokunjalo, uKgathi uthe sebeqale ukukhulumisana lohulumende weZimbabwe ukuthi abasenkambeni yeziphepheli baphindele ekhaya. Uma bengaqhubeka behlala eDukwi, abeZimbabwe kanye lezinye iziphepheli ezivela kwamanye amazwe zizahluzula isikhwama sika hulumende weBotswana ngezigidi ezimbili zamapula ngomnyaka.

Iziphepheli zibikwa sezilamba enkambeni yeDukwi ngalesisikhathi iUNHCR isiyehlise usizo.

Omunye ohlala enkambeni uWasu Chibi, uthi impilo inzima enkambeni njalo bavele sebefuna ukuphuma.

"Ukudla esikuphiwa akulingani … Into esiyifisayo yikuvunyelwa ukuyadinga imsebenzi ngaphandle."

Kodwa akucacanga ukuthi isimo eZimbabwe sesilungile yini ukuthi iziphepheli ziphenduke, ngesikhathi kukhangelelwe ukuqonga kodlakela ilizwe lilungiselela ukhetho luka 2018.

Esinye njalo isizalwane seZimbabwe, uAlias Moyo, uthe akulasizatho sokuthi abeZimbabwe bangene eBotswana njengeziphepheli.

"Akulasizatho ukuthi bahlale eDukwi ikakhulu intsha ngoba bayenelisa ukuphuma bayethola amathuba angcono kwamanye amazwe, kulokutshona behlezi eDukwi."

Isikhulumi senhlanganiso yeUNHCR kweyinye ingxoxo, satshela iStudio 7 ukuthi inhlanganiso le ifisa ukuthi amazwe ngamazwe zibe yizo ezikhangela iziphepheli.

"Inkamba eseFrancistown isizakuba ngaphansi kukahulumende weBotswana. Ayisikho ukuthi sesivala. Vele sifuna ohulumende kube yibo abahamba phambili ekukhokhelini inkamba lezi."

AbeZimbabwe laba bahlala enkambeni yeDukwi ngaphandle kwedolobho leFrancistown.

Inengi lafika eBotswana ngemva kokubalekela udlakela olwa qhamuka kulungiselelwa ukhetho lukamongameli ngomnyaka ka2008.

XS
SM
MD
LG