amalinks wokungena

Dabengwa: Kangisoze Ngingene Kukhetho Lukamongameli Ngo2018


Iziphathamandle zeZapu lamanye amabandla zisemhlanganweni omkhulu wokukhetha inkokheli owe Zapu Congress

Umhlangano omkhulu weCongress owebandla leZAPU uphele kahle ngoMgqibelo lapho uMnu. Dumiso Dabengwa ebuyele esikhundleni sokukhokhela kungela muntu omelane laye.

Emazwini akhe okuvala lumhlangano, uDabengwa ucele ibandla leZapu ukuba lidinge omunye umuntu ozathatha indawo yakhe ngoba engasoze acintise kukhetho lokudinga umongameli welizwe ngo 2018, ethi ukhangelele ukukhumula amajogwe ekweniliseni iminyaka engamatshumi ayisificamunwe mibili-80 ukwenzela ukuba ibandla lingafi kumbe lifane leZanu elilomkhokheli owalela esikhundleni.

UDabengwa uphinde wachasisa kabanzi ngesisekelo sebandla.

Uthe lumhlangano abawuqgibileyo ubavumele ukuhluzisisa iCoaliton of Democrats (CODE) lokusebenzelana leNational Election Reform Agenda (NERA).

Uphinde wasola udlakela oludalwa nguHulumende esebenzisa ucuku kulabo abatshengiselayo.

UNkosikazi Lora Makuzva okhethwe ukuba ngumsekeli kaDabengwa, uveze ukuthokoza ethi kodwa akulula ukusebenza lomuntu ohlonipheka njengomkhokheli wakhe.

Uthembise ukuthi uzazama ngamandla wonke ukuthuthukisa impilo yabomama abalwa impi esithi lalabo abathuka uNkosikazi Joyce Mujuru bachitha isikhathi ngoba uyinkokheli ngenxa yembali lemisebenzi yakhe.

Ibandla leZAPU lenze inguquko ezine kusisekelo sebandla, sokuba iNational People’s Council ibe lotshalimani ozakhokhela njalo ikhansili yebandla, inhlanganiso yabalwa impi yenkululeko eyeZIPRA Veterans Association ibeyingxenye yebandla, amakhansili ezigaba abeyingxenye yebandla, lokuthi iNational Executive Council ibe labasekeli.

Umhlangano uphinde wapha umkhokheli amandla okukhetha amalunga amahlanu azangena kuNEC, kwathi obona ngemithetho yebandla walaywa ukuthi ahle aqale ukwenza inguquko le kusisekelo sebandla, njalo leNEC yanikwa Amandla okwenza izinqumo zokusebenzelana lamanye amabandla ezombusazwe uma kungephuli iziqondiso zesisekelo kunye lombono webandla.

XS
SM
MD
LG