amalinks wokungena

Erol Akbay: Lidlale Okujabulisayo Iqembu leHighlanders

  • Joseph Njanji

Umqeqetshi weHighalnders uErol Akbay.

Iqembu le Ngezi Platinum Stars liqhubekele phambili lilokhu lihlezi phezu kwengalane yemiklomelo loba nje linqotshwe nge 1 ka nya liqembu elingene lonyaka kusigaba se Premier Soccer League ele Yadah.

Abafana be Ngezi Platinum balemiklomelo eyithoba munwe munye ngemva kokudlala imidlalo emine kuthi iqembu le Yadah lona okuliqembu likamprofethi uWalter Magaya lihlezi likundawo yesibili lilemiklomelo eyithoba minwe mbili ngemva kwemidlalo emine njalo.

Kundawo yesithathu kuleqembu le FC Platinum lona elilemiklomelo eyisikhombisa njalo elibe ngutshiki lobhanqa 1 ka 1 leqembu le Bulawayo City lalo elilemiklomelo eyisikhombisa njalo elihlezi endaweni yesine.

Iqembu le Chicken Inn lona elinqobe ele Triangle nge 1 ka nya lihlezi kundawo yesihlanu lilemiklomelo eyisithupha okulinani eliphethwe liqembu le Black Rhinos lona elinqobe ele Bantu Rovers nge 3 ka nya kanye lele Highlanders lona elitshaye ele ZPC Kariba nge 3 ka 2.

Ekhuluma lentathelizindaba zemidlalo ekupheleni komdlalo umqeqetshi weqembu le Highlanders uErol Akbay utshayele ihlombe abadlali bakhe ngokunqoba kwabo.

“Ngiyajabula ngendlela esidlale ngayo. Sizamile ukudlala kuhle ngehlandla lakuqala langehlandla lesibili njalo obekudingakala yikuba sihlohle. Amathuba okuthi sihlohle abekhona kodwa kasiyenelisanga ukuwasebenzisa ngehlandla lakuqala.

“Ngehlandla lesibili sibekwazi ukuba iqembu le ZPC selifuna ukuvimba kodwa ngenxa yezulu ebeselisina inkundla ibisitshelela ibhola seligijima kakhulu, lokhu kusiphathisile ukuba sihlohle kabili kumizuzu emihlanu eyakuqala eyehlandla lesibili.”

Intshantshu zanyakenye iqembu le CAPS United lihlezi kundawo yethoba minwe mbili lilemiklomelo emihlanu njalo libe ngutshiki lobhanqa 1 ka
1 leqembu le Tsholotsho kuthi ngaphansi kwalo kuleqembu le Shabanie Mine lalo elilemiklomelo emihlanu njalo elibe ngutshiki lobhanqa 0 – 0 leqembu le Harare City.

Iqembu le Dynamos linqobe ele Hwange nge 1 ka nya njalo lihlezi kundawo yetshumi lilemiklomelo emine ndawonye le Tsholotsho, iHow Mine kanye le Hwange. Abafana be How Mine banqobe abe Chapungu nge 2 ka 1.
Iqembu le ZPC Kariba lihlezi endaweni yetshumi lane njalo lilemiklomelo emithathu okulinani eliphethwe liqembu le Bantu Rovers elihlezi kundawo yetshumi lanhlanu.

Abafana be Harare City bahlezi endaweni yesithathu nxa usuka ngaphansi kwengalane belemiklomelo emibili okulinani eliphethwe liqembu le Triangle kuthi iqembu elijeke amanye engalaneni ngele Chapungu elilomklomelo owodwa kuphela ngemva kokudlala imidlalo emine.

Facebook Forum

XS
SM
MD
LG