amalinks wokungena

'Asimangalisi Isinqumo seEU Sokumisa Ukuphapha Kwendizamtshisa zeAir Zimbabwe

  • Mavis Gama

Izizalwane zeZimbabwe ezinengi zithi kalimangalisi inyathelo elithethwe yinhlanganiso yomanyano wamazwe aweEuropean Union lokwalela indizamtshina zenkampani yeAir Zimbabwe ukuphapha zisiya khona ngoba zibikwa zingalungelanga ukusetshenziswa.

Lokhu kuphume ekupheleni komhlangano wamazwe akumanyano we European Union, owenzelwe esigodlweni seBelgium, iBrussels.

Uhlangothi olubona ngezokungena lokuphuma kwendizamtshina, emazweni la, olwe European Aviation Safety Agency, yilo olwethule isiqondiso sokuba zimiswe ukungena kuEU, indizamtshina ezivela emazweni abalisa ele Nigeria, St Vincent and the Grenadines, Ukrain le Zimbabwe, ngemva kokwehluleka kwawo ukulandela iziqondiso ezavunyelanwa ngomnyaka ka 2015.

Kuthi-ke eleMozambique lele Benin akhitshwa kuluhlu lwamazwe angavunyelwa ukuphaphela emazweni alumanyano, ngoba enelise ukugcwalisa lezi ziqondiso.

Isikhulumeli sebandla lezombusazwe eliphikisayo, ele United African National Council (UANC), uMnu. Alpheus Mpuranga, uthi lanxa sibuhlungu lesi senzo, bekumgceke ukuba kuzokwenzakala ngalendlela.

Kungumgoqo omkhulu kunkampani ye Air Zimbabwe, lelizwe, uMapuranga ethi sekuvimba enye indlela ilizwe ebelithola ngayo imali yakwamanye amazwe.

Eyinye yentathelizindaba, eloba izimele, uMnu. Mlondolozi Ndlovu, uthi lesi sehlakalo yisibonelo sokwehluleka kukahulumende we Zimbabwe.

Lokhu kwenzakala ngesikhathi, umkwenyana kamongameli Robert Mugabe, uMnu. Simba Chikore, wanikwa isikhundla sokuba ngumqondisi obona ngokuqhutshwa komsebenzi kunkampani ye Air Zimbabwe, uChief Operations Officer.

Ubikwa eholiswa amadollar edlula isigidi samadola ngenyanga, uChikore, yona inkampani ingangenisi mali, lendizamtshina zingekho, ezikhona kungezindala kakhulu, zidala indleko yokuzilungisisa.

Facebook Forum

XS
SM
MD
LG