Indlala iqhubeka isidla ubhedu ikakhulu emaphandleni lanxa inhlanganiso ezigoqela iUnited States Agency for International Development (USAID), kanye leyeWorld Food Program ziphathisa abalambayo ngokudla.
Isiphathamandla sebandla leZanu PF eTsholotsho, uMnu Believe Gaule, uthi ingxaki yikuthi ukudla lokhu kwabelwa ihlekana labantu kukanti phose wonke umuntu uyalamba.
Wengeze wathi uhlelo lokwabela abalambayo ukudla oluqhutshwa ngummeli weTsholotsho North edale lephalamende uMnu Jonathan Moyo, luqondiswe kuzakhamizi zonke, kungakhathalekile ukuthi umuntu usekela luphi uhlangothi kwezombusazwe.
Owayeyisiphathamandla seZanu PF eSilobela, kodwa osesekela ibandla leMDC-T uMnu Maqhawe Moyo, usekele umbono kaGaule.