amalinks wokungena

Zindala Zombili: IHighlanders Ingqikilana leDynamos ...

  • Joseph Njanji

highlanders

Imidlalo yenguqu kusigaba se Premier Soccer League ingena kuviki lethoba minwe mbili kulimpelaviki kulomdlalo ogobhozisa amathe ozakuba phakathi kweqembu le Highlanders lele Dynamos enkundleni ye Barbourfields ngeSonto.

Imidlalo iyaqala ngoMgqibelo lapho okulemidlalo emibili ezaqhutshelwa enkundleni ye Barbourfields koBulawayo njalo owakuqala uzakuba phakathi kweqembu le How Mine leqembu le FC Platinum ozadlalwa ngehola lakuqala emini kuthi owesibili uzakuba phakathi kweqembu le Bulawayo City leqembu le Black Rhinos ngehola lesithathu emini.

Yomibili limidlalo izasakazwa kumabonakude we Supersport.
Kweminye imidlalo ekhona kusasa iqembu le ZPC Kariba lizadlala lele Tsholotsho enkundleni ye Nyamhunga kuthi iqembu le Yadah lizadibana leqembu le Chicken Inn enkundleni ye National Sports Stadium.

NgeSonto zonke indlela ziyabe ziqonda enkundleni ye Barbourfields lapho okulomdlalo ozakuba phakathi kwamaqembu amakhulu elizweni ele Highlanders lele Dynamos.

Ekhuluma lentathelizindaba zemidlalo mayelana lalumdlalo umqeqetshi weqembu le Highlanders uErol Akbay uthe kumele iqembu lakhe linqobe ngeSonto.

“Umdlalo wethu leqembu le Dynamos uqakathekile kakhulu ngoba kumele sinqobe ukuze siyale silokhu siphezu kwengalane yemiklomelo. Lalo iqembu leDynamos lizabopha ziqine ngoba lidlala lathi yikho ke ngibona ukuba lumdlalo uzakuba mnandi njalo isingiphuzele iSonto ukufika.”

Kusenjalo isiphathamandla seqembu le Highlanders uNhlanhla Dube ukhuthaze abalandeli beqembu ukuba behlukane lobudlwangudlwangu ngeSonto.

“Sikhathazekile ngesimo seqembu njalo sizimisele ukuxoxisana labalandeli bethu sibakhuthaza ukuba bengaphoseli lutho enkundleni, bengalokothi balugxobe enkundleni futhi, njalo beziphathe kuhle loba bethabile kumbe sebecunukile.”

Kweminye imidlalo yesigaba se PSL ezadlalwa ngeSonto iqembu leHwange lizemukela ele Triangle ngase Colliery, ele Shabanie Mine lizadlalal lele Chapungu, iqembu le Harare City lizangqikilana lele Ngezi Platinum Stars ngase Morris Depot kuthi umdlalo obekumele ubephakathi kweqembu le CAPS United lele Bantu Rovers udluliselwe phambili ngoba iqembu le CAPS liseGipite lapho eliyedlala khona lele Zamalek kumncintiswano we CAF Champions League.

Facebook Forum

XS
SM
MD
LG