Iqembu le FC Platinum yilo eselihlezi phezu kwengalane esigabeni se Castle Premier Soccer League ngemva kwemidlalo yangempelaviki.
Iqembu le FC Platinum libe ngutshiki lobhanqa 0 ka 0 leqembu le Caps United ngoMgqibelo okuyimpumela ekhuphule inani lemiklomelo elilayo laya kumatshumi amabili lesikhombisa.
Lokhu kudale ukuba lindize liyehlala phezu kwengalane njengoba iqembu le Highlanders lona ebelihlezi phezulu phambilini kwemidlalo yangempelaviki lilemiklomelo engamatshumi amabili lesithupha.
Iqembu le Highlanders likundawo yesibili njalo lilingene ngemiklomelo leqembu le Caps United lona elihlezi endaweni yesithathu.
Umdlalo obekumele udlalwe liqembu le Highlanders lidibana leqembu le Triangle kanye lobekumele udlalwe liqembu le Tsholotsho lingqikilana lele Mutare City idluliselwe phambili njalo umqeqetshi weqembu le Tsholotsho uLizwe Sweswe uthi abakatholi ukuba limidlalo izadlalwa nini.
Endaweni yesine engalaneni yemiklomelo kuhlezi iqembu le Dynamos lona elilemiklomelo engamatshumi amabili lantathu ngemva kokunqoba ele Border Strikers nge 2 ka nya ngeSonto.
Kundawo yesihlanu kuleqembu le ZPC Kariba lona elilemiklomelo engamatshumi amabili lambili njalo elitshaywe nge 1 ka nya liqembu le Ngezi Platinum.
Iqembu le Triangle lihlezi endaweni yesithupha lilemiklomelo elitshumi lathoba munwe munye njalo ngemva kwalo kulamaqembu amathathu alemiklomelo elitshumi lesikhombisa abalisa ele Chicken Inn, ele Bulawayo City kanye lele Ngezi Platinum.
Iqembu le Chicken Inn lidliwe nge 2 ka 1 ngele Chapungu ngoMgqgibelo kuthi ele Bulawayo City linqobe ele Hwange nge 1 ka nya ngeSonto.
Kundawo yestshumi kuleqembu le Harare City lona elilemiklomelo elitshumi lesithupha njalo elibe ngutshiki lobhanqa leqembu le How Mine 0 ka 0.
Abafana be How Mine bakundawo yetshumi lanye njalo balemiklomelo elitshumi lanhlanu okulinani eliphethwe liqembu le Chapungu kanye leqembu le Hwange.
Iqembu le Mutare City lihlezi endaweni yesithathu nxa usuka ngaphansi kwengalane njalo lilemiklomelo eyithoba munwe munye kuthi iqembu le Tsholotsho lisendaweni yesibili nxa usuka ngaphansi kwengalane lilemiklomelo eyithoba minwe mbili.
Iqembu le Border Strikers yilo elijeke amanye wonke lisemsileni wengalane lilemiklomelo eyisithupha.
Kolunye udaba olumayelana lomdlalo wenguqu iqembu elimela ilizwe le Portugal yilo eliphakamise isicoco emncintiswaneni we Euro 2016 ngemva kokunqoba iqembu lase France nge 1 ka nya ngeSonto.
Ngokokuqala ukuba ilizwe lePortugal liphakamise linkezo kumbali yalumncintiswano njalo lephule inhliziyo zezizalwane zeFrance okuyilo ilizwe ebeliqoqe limidlalo.
