Izisebenzi ezingaba yinkulungwane lengxenye – 1,500 zenkampani yakwele China eye Anjin Investments (Pvt) Ltd emba amadayimana eMarange ezikhalale umsebenzi zifuna iholo elikhuphukileyo sezimiswe umsebenzi okwamalanga amane.
Izisebenzi lezi zithi zijeziselwa ukuthi zifuna iholo likhuphuke liyefika kumakhulu ayisithupha lamatshumi amahlanu amadollar eMelika - $650 lisuka kumakhulu amabili lamatshumi amathathu lanhlanu amadollar – $235.
Zithi inkampani le eyaziwayo ukuthi yiyo enkulu emba amadayimana kwele Zimbabwe, ifuna ukuxotsha izisebenzi ezingamakhulu amahlanu - 500 kusukela ngoLwesine.
Ngelanga linye kuzahlolisiswe izenzo zonke zezisebenzi esezikhalale umsebenzi okwamaviki amabili ngenxa yeholo eliphansi lokuxotshwa kwalabo akade bekukhomithi yezisebenzi.
Ziphinde zathi okunye njalo okusinda izisebenzi yikuthi kulabaqondisi be Anjin Investments ababhinya amanye amadoda emsebenzini.
Abaqondisi laba kubikwa ukuthi sebebhalele izisebenzi bexolisa ngesenzo lesi njalo bathembisa ukuthi abenza lokhu kuzamele babuyele kwele China.
Isikhulumeli sezisebenzi esingagunanga ukuqanjwa ngegama sitshele iStudio 7 ukuthi izisebenzi sezibuyela emakhaya.
