Uzulu weZimbabwe uthi ukhathazekile ngokubikwe yisikhulumeli sebandla leZanu PF, uMnu Chris Mutsvangwa, othi ibandla lakhe yilo elizakhokhela uhlelo lukahulumende olokwabela abantu abalambayo ukudla.
UMutsvangwa wethule umbiko lo eHarare lapho atshele intathelizindaba ukuba yikho lokhu okuzakwenziwa ezigabeni zonke ezibhekane lendlala.
Inkokheli zomdabu yizo ezizakhokhela loluhlelo njalo ngoMvulo bekulusuku lokucina olokubhalisa abadinga usizo lokudla.
Esikhathini esedluleyo uhlangothi lukahulumende weMelika olweUSAID lezinye inhlanganiso eziphathisa ngoncedo ziveze ukukhathazeka ngenxa yokusetshenziswa kokudla ukulwa impi zezombusazwe.
Ngenyanga edluleyo umongameli Emmerson Mnangagwa wazise ukuba ilizwe lidinga izigidi ezimbili zamadola eMelika eyokuphathisa abalambayo.
Owayengumgcinisihlalo wenhlanganiso elwela amalungelo ezakhamuzi zakoBulawayo eyeBulawayo Progressive Residents Association uMnu Ambrose Sibindi uthi uhlelo lolu kufanele luphathise njalo lalabo abasemadolobheni.
Forum