Abasekeli bebandla leZimbabwe People First abagoqela owayeyisiphathamandla sebutho uMnu. Agrippa Mutambara, balimele kakubi ngeSonto ngemva kokutshaywa ngabasekeli beZanu PF eGuruve.
UMutambara labanye bakhe abahlanu bahlaselwe ngabacabangelwa ukuthi yizikliwi zeZanu PF ngesikhathi besethekelela ipulazi lesinye isiphathamandla sebandla labo elithunjwe ngabasakhulayo beZanu PF.
NgoMvulo abatshayiweyo laba bebelaliswe kwesinye isibhedlela lapho ababikwa belindwe khona ngamapholisa.
Umsekeli wesikhulumeli sebandla leZimbabwe People First uMnu. Methuseli Moyo usole kakhulu udlakela lolu.
“Yisehlakalo esibi kakhulu ukuthi abantu ngensuku zanamuhla bebe betshaywa. Kodwa vele ngumkhuba wayo iZanu PF,” kutsho uMnu. Moyo.
Ibandla eZimbabwe People First likhokhelwa nguNkosikazi Joice Mujuru, yena oxotshwe kubandla leZanu PF eminyakeni esanda kwedlula esetheswa icala lokuzama ukugenquma uMongameli Mugabe embusweni.