Umanyano wenhlanganiso ezikhangele udaba lweZimbabwe kweleBotswana luthi sokuyisikhathi sokuthi umongameli Ian Khama weBotswana, njengomgcinisihlalo weSADC angenele kudaba lweZimbabwe, njalo zisithi kumele amalungelo alabo abaphatheke ekutshengiseni ahlonitshwe.
Inhlanganiso ezihlangane phezu kodaba lweZimbabwe ezibumba iBotswana Civil Society Solidarity Coalition for Zimbabwe-BOCISCOZ, zithi kumbalwa okumele kulungiswe eZimbabwe kulandela ukuqhamuka kokutshengisela emavikini asanda kudlula.
Isikhulumi senhlanganiso elwela amalungelo oluntu eyeDitshwanelo, uNkosazana Tlasetso Palime uthi bananzelele ukuthi isikhathi sokugoqa izandla ngodaba lweZimbabwe sesidlule, ngakho bafisa umongameli Ian Khama, njengomgcinisihlalo weSADC, ukuthi angenele.
"Silethemba ukuthi ngokukhipha ilizwi lethu kuzakwenza ukuthi amanye amazwe lawo athathe amanyathela njalo umongameli Khama njengo mgcinisihlalo weSADC angenele."
Kodwa omunye oweZimbabwe uthi noma nje kulungile ukuthi inhlanganiso ezitshiyeneyo ikakhulu eluhlwini lwangezansi kweAfrica, zitshengise ukukhathazeka ngesimo eZimbabwe, kuzaba nzima ukuthi umongameli Khama angenele ngesikhathi esezaqeda isibanga sakhe ngengo mgcinisihlalo weSADC.
"Kumele sikhumbule ukuthi ngenyanga ezayo kungena umngcinisihlalo omutsha ngakho imizamo kumele ibheke kuye hatshi kukhama yena osetshiya lesisikhundla."
IBOCISCOZ ithi ikhathazeka njalo ngocuku lwamapholisa kulabo abatshengiselayo isithi kumele kube lontshitsho amalungelo oluntu ahlonitshwe.
Inhlanganiso le ithi uhulumende weZimbabwe ayekele abantu batshengisele ngokuthula, hatshi ukubaphatha ngodlame.
Njalo ithi uhulumende kumele abuyisele emuva imthetho engahambelani lozulu efana lokumisa ukuthenga eyinye imphahla yelizwe, isithi lokhu kubulala impilo yenengi ikakhulu eliphila ngokuthengsa imphahla evela phandle kwelizwe.
Ithi lokhu kuphambana lezivumelwano ezalotshwa ngaphansi kwemithetho yokuthenga lokuthengiselana ngaphansi kwenhlanganiso yeSADC.
IBOCISCOZ ithi eyinye imithetho encindezela uzulu efana lemigoqo eyinziwa ngamapholisa engacaciyo emgwaqweni kumele ihambe.
Okukicina bathi ukungenela kweSADC ngomongameli Khama kuqhakathekile ngoma isimo seZimbabwe silimaza ukuthula kanye lokumanyana kuzwekwazi lezansi kweAfrica.
