Imidlalo yenguqu eyesigaba sePremier Soccer League ingena kuviki yamatshumi amabili lambili kulimpelaviki kuthi iqembu lama Warriors lizadibana leqembu le Guinea ngeSonto kumkhankaso wokudinga amaqembu azakuyaphatheka kmncintiswano we AFCON.
NgoMgqibelo kulemidlalo emine eye Premier Soccer League. Iqembu le Bulawayo City lizemukela ele Mutare City enkundleni ye Barboufields, iqembu le ZPC Kariba lizangqikilana leqembu elihlezi phezu kwengalane ele FC Platinum enkundleni ye Nyamhunga, iqembu le How Mine lizadibana lele Tsholotsho enkundleni yeLuveve kuthi eleHarare City lizadlala lele Ngezi Platinum Stars enkundleni yeRufaro.
NgeSonto kulemidlalo emithathu. Iqembu le Triangle lizemukela iqembu elihlezi kuzinga lesibili engalaneni yemiklomelo ele Caps United enkundleni ye Gibbo, iqembu le Dynamos lizadlala lele Chapungu enkundleni ye Rufaro kuthi iqembu le Border Strikers lizadibana leqembu le Highlanders enkundleni ye Dulivhadzimu.
Iqembu le Border Strikers yilo elihlezi ngaphansi kwengalane kodwa lidala kuhle kakhulu nxa lidlala lisekhaya.
Ensukwini ezedluleyo abafana be Border Strikers batshaye iqembu le Dynamos bedlala besekhaya kodwa umqeqetshi weqembu le Highlanders uErol Akbay uthi isikhathi sokudliwa ngamaqembu amancane asisekho ngoba befuna ukuthuthukisa amathuba abo awokuphakamisa isicoco ekupheleni kwesizini.
“Amathuba amaqembu wonke alingene njengoba amaqembu ahlezi phezu kwethu lawo abengadlali kuhle yikho kunengi okungenzakala njengoba kulemiklomelo engamatshumi amabili lesilhombisa okumele siyidlalele kumidlalo eyithoba munwe munye eseleyo. Loba yiliphi iqembu elidlala kusigaba saphezulu lilakho ukuphakamisa isicoco.”
Omunye umdlalo weviki lamatshumi amabili lambili uzadlalwa ngeviki ezayo ngoLwesine njalo uzakuba phakathi kweqembu le Chicken Inn lele Hwange.
Lumdlalo udluliselwe phambili njengoba iqembu le Chicken Inn lilabadlali abayingxenye yeqembu lesizwe elizadibana leqembu le Guinea ngeSonto kumdlalo wokucina owesibaya sika Group L kumkhankaso owokudinga amaqembu azakuyaphatheka kumncintiswano we 2017 Africa Cup of Nations ozaqhutshelwa elizweni le Gabon ngomnyaka ozayo.
Iqembu le Zimbabwe livele selaphumelela ukuba ngelinye lamazwe azakuyadlala kwele Gabon njalo likhangelelwe ukuphakama kusasa ekuseni lilubhekise kwele Guinea ngemva kokwehluleka ukuhamba namhla ekuseni.
Abadlali baleliqembu abadlala phetsheya kolwandle abagoqela uKnowledge Musona, uMarvelous Nakamba kanye lo Mathew Rusike bakhangelelwe ukuhlangana labanye khonale eGuinea.