amalinks wokungena

IBosso Itshiya Iqembu leHow Mine Limanikiniki

  • Joseph Njanji

Abafana beHighlanders Football Club bayaqolotsha eBF.

Iqembu lenguqu ele Highlanders lize lanqoba ngemva kwemidlalo eyisithupha lithwele amagabha avuzayo.

Iqembu le Highlanders litshaye ele How Mine nge 2 ka nya ngeSonto enkundleni ye Barbourfields okuyimpumela eze ngemva kwemidlalo eyisithupha amahlolanyama etshila imoya yabalandeli. Bekusehlula ukuba leliqembu linqobe amanye.

Ukunqoba kweqembu leHighlanders kwenze lenelise ukwala lilokhu lihlezi kuzinga lesithathu engalaneni yemiklomelo lilemiklomelo engamatshumi amathathu lanhlanu.

Ukaputeni weqembu le Bosso uFelix Chindungwe uthi badlale ngokuzimisela okukhulu ngoba besebekhathele ngokudliwa.

“Namhlanje wonke umuntu udlale etshingisela ukuba ufuna ukunqoba njalo lokhu kukhanye ngokuba sihambe kukhefu sesihlohle zaba mbili okuyinto esacina kudala ukuyenza.”

Phezu kwengalane kutholakala iqembu le FC Platinum lona elilemiklomelo engamatshumi amane lantathu njalo elibe ngutshiki lobhanqa 1 – 1 leqembu le Chicken Inn ngoMgqibelo.

Endaweni yesibili kuhlezi iqembu le Caps United lona elilemiklomelo engamatshumi amane njalo elibhaxabule ele Mutare City nge 4 ka 1 ngoMgqibelo.

Iqembu le Mutare City lihlezi kundawo yesine lilemiklomelo engamatshumi amathathu lane njalo linqobe ele Tsholotsho nge 2 ka 1 ngoMgqibelo kuthi kundawo yesihlanu kuhlezi iqembu le Dynamos lona elilemiklomelo engamatshumi amathathu lambili njalo elibe ngutshiki lobhanqa 0-0 lele Ngezi Platinum ngeSonto.

Kundawo yesithupha kuleqembu le Traingle lona elilemiklomelo engamatshumi amathathu njalo elinqotshwe nge 5 ka 3 ngele Hwange kuthi endaweni yesikhombisa kuleqembu le Harare City elilemiklomelo engamatshumi amambili lathoba munwe munye njalo elinqobe iqembu le Bulawayo City nge 2 ka 1 ngoLwesihlanu.

Amaqembu abalisa elel Chicken Inn, ele How Mine kanye lele Bulawayo City ahlezi ngaphansi kweqembu le Harare City njalo womathathu alemiklomelo engamatshumi amabili lathoba minwe mbili iqembu ngalinye.

Endaweni yetshumi lanye kuleqembu le Chapungu lona elibhaxabule ele Border Strikers nge 3 ka nya ngoMgqibelo njalo lilemiklomelo engamatshumi amabili lesikhombisa okulinani eliphethwe ngamaqembu ahlezi ngaphansi kwalo abalisa ele Ngezi Platinum kanye lele Hwange.

Iqembu le Mutare City lihlezi endaweni yesithathu nxa usuka ngaphansi kwengalane lilemiklomelo elitshumi lesikhombisa kuthi iqembu le Tsholotsho lihlezi endaweni yesibili nxa usuka ngaphansi kwengalane lilemiklomelo elitshumi lantathu ikanti ele Border Strikers yilo elihlezi ngaphansi kwengalane lalo lilemiklomelo elitshumi lantathu.

Kolunye udaba olumayelana lomdlalo wenguqu, iqembu lesizwe elama Warriors likhangelelwe ukuqala kusasa amalungiselelo alo awokuyadlala leqembu le Guinea kumdlalo wokucina owesibaya sika Group L owokudinga amaqembu azakuyaphatheka kumncintiswano we 2017 Africa Cup of Nations ozaqhutshelwa elizweni le Gabon ngomnyaka ozayo.

Iqembu le Zimbabwe livele selaphumelela ukuba ngelinye lamazwe azakuyadlala kwele Gabon njalo umqeqetshi uKallisto Pasuwa ukhangelelwe ukuba aphe ithuba abanye abadlali abangajwayelanga ukudlala loba nje ebize inengi labadlali abathenjiweyo.

Umgadli weqembu le Mamelodi Sundowns uKhama Billiat nguye ophiwe ithuba lokuphumula njengoba iqembu lakhe liphatheke kumncintiswano wokudinga intshantshu zezwekazi lase Africa.

XS
SM
MD
LG