Icala lokutshaphazwa kwemali yesikhwama seZimbabwe Manpower Development Fund (ZIMDEF) eletheswa umphathintambo wezemfundo yaphezulu, uMnu. Jonathan Moyo, akade lusemthethwandaba weHigh Court eHarare ngoLwesibili ludluliselwe kuviki ezayo.
UMoyo wamangalelwa nguMnu. Hardlife Mudzingwa olilunga wenhlanganiso yeTajamuka-Sesisijikile Campaign ekhankasela ukuthi kubelenguquko kwezombuso lezomnotho eZimbabwe.
Lokhu kuza ngemva kokuba igqwetha elimela uMudzingwa kuloludaba, uMnu. Simon Mupindu, othe umahluli wenze kahle njengoba efuna ukuthi abale amaphepha awethulwe ngamagqwetha kaMoyo.
UMupindu uthe kwaphuza ukuthi athole amaphepha la.
Udaba lwemali ye ZIMDEF lukhulunywe ngalo laku gwalo olujulileyo lukamabhalane obona ngendleko zikahulumende, obizwa ngokuthi nguAuditor General, kunsukwana ezedlule.
Loludaba luthethwa emawofisini ka Justice Loice Matandamoyo. UMudzingwa ufuna umthethwandaba uthonise uMoyo owavuma ukuthi watshaphaza imali ezinkulungwane ezingamakhulu amane, $400,000 kodwa yena uthi wasebenzisa limali ukuthuthukisa isigaba seTsholotsho ngokuthenga amabhayisikili lempahla etshiyeneyo.
Ngakolunye udaba, amapholisa ohlangothi lwe riot, ngoLwesibili avimbe izizalwane ezilitshumi lambili ekade zifisa ukungena edale lephalamende ukuyasekela uMnu. Themba Mliswa obekhangelelwe ukugcotshwa njengommeli wesigaba se Norton ngemva kokunqoba kukhetho lwe by-election, oluqhutshwe ngempelaviki.
Ukunqoba kukaMliswa kumangalise abantu abanengi.
Amapholisa ahlome okumangalisayo ayelile ukuthi amalunga enhlanganiso le angene kudale leli.
Omunye walabo abavinjiweyo kunguMnu. Charles Nyoni ophatheke kumikhankaso yokulwela ilungelo loluntu lobukhokheli obuqotho.
UNyoni uthe batshelwe ngamapholisa ukuthi bangeke benze abakufunayo edale lephalamende.