Umphathintambo wezokulondolozwa kwemvelo, ukutholakala kwamanzi kanye lokuguquka komkhathi, uNkosikazi Oppah Muchinguri Kashiri, uthi sokumele ayebikela uMongameli Robert Mugabe ukuthi isimo samanzi eZimbabwe sesisibi kakhulu.
UMuchinguri-Kashiri uthe uzakuyacela ukuthi uMugabe ayethule umbiko obizwa ngokuthi yi-national disaster ngesilungu okuzaveza ukuthi ilizwe selibhekane lenkinga emangalisayo yokuswela amanzi.
Uthe inkinga yamanzi enje yacina ukuba khona iminyaka engamatshumi amabili lanhlanu adluleyo.
UMuchinguri-Kashiri uthe ngalesi sikhathi somnyaka iZimbabwe ijayele ukuba lamanzi ayisilinganiso esedlula kancinyane amatshumi ayisithupha ekhulwini - 62,3%. Uthe okwamanje kulamanzi elizweli lonke jikelele angaba yisilinganiso esedlula kancane amatshumi amane ekhulwini 41.9%.
Kungalesi sizatho ke umqondisi wezokulondolozwa kwamanzi kuhlangothi lukahulumende olwe Zimbabwe National Authority, uDr. Jefta Sakupwanya, ukhuthaze uzulu, abamankampani kanye labalimi ukuba bawalondoloze lawo manzi amalutshwana.
Abantu abakhulume leStudio 7 abanjengo Mnu. Dumezweni Jama bathe ilizwe likhanya lingela nhlelo ezibalulekileyo ezokulondoloza amanzi.
UJama uthe kuyafuneka ukuthi kube lenhlelo ezinjalo ukwenzela ukuthi kube lamanzi angasoze aphele mahlayana.
Uhulumende laye uyavuma ukuba kade engakho amalungiselelo aqinileyo nxa kuthe kwaba lesimo saloluhlobo lanxa inhlelo zikhona ukwakha amadamu ukungezelela kulawo avele ekhona.
