Izisebenzi zikahulumende ezikhalale umsebenzi ngoMvulo zehlulana lohulumende ngoLwesithathu ngenani lokwengezelela iholo, lokhe zilahle amajogwe loba nje kusobala ukuthi uhulumende kalamali leyo eziyifunayo.
Uhulumende uthembise ukukhuphula iholo lezisebenzi zonke ngezigidi ezingamakhulu edlula amabili amadollar-$240.
Lokhu kwaliwe yizisebenzi ezithi akuqedakali ukuthi imali le izakwabelwa njani izisebenzi zonke zikahulumende njengoba kungaziwa lokuthi kuzahlephunwa mali ziphi ezinjengamapentsheni lemithelo kahulumende.
Imali le evezwe nguhulumende isididanise izisebenzi ingqondo njengoba nxa zihlala phansi zizama ukuyihlolisisa akukhanyi ukuthi izakwabiwa njani.
Izisebenzi zifuna ukuthi labo abahola imali ephansi bathole amakhulu amahlanu lamatshumi ayisitshiyangalombili amadollar eMelika ngenyanga. Okwamanje zithola amakhulu amabili amadollar.
Izisebenzi lezi sezitshiye uhulumende eswele okokwenza njengoba amawofisi amanengi abikwa evaliwe endaweni ezitshiyeneyo zelizwe. Izikolo ezinengi lazo bezibikwa zivaliwe.
Uhulumende kukhanya kalamali eyeneleyo yokukhuphula iholo lezisebenzi loba kulemali enengi ekhangelelwe ukutholakala lonyaka emsebenzini wokwemba amatshe aligugu amadayimana akoChiadzwa eMarange esabelweni se Manicaland.
Amankampani azimeleyo lawo amele ukubona okuzaphuma phakathi kukahulumende lezisebenzi zakhe. Ngakwelinye icele evele ehlaba umkhosi ekhala ngokuthi kasoze ayenelise ukukhuphula iholo lezisebenzi zawo ngemali ethe xaxa lonyaka ngenxa yokuswela imali yokulungiisa impahla enengi.
Ukuze sihlaziye loludaba uGibbs Dube owe Studio 7 uxoxe loMnu. Sifiso ndlovu owenhlanganiso yomanyano wenhlanganiso zezisebenzi zikahulumende eye Apex Council njalo ongumqondisi wenhlanganiso yababalisi eye Zimbabwe Teachers Association eloMnu. Bulisani Ncube umqondisi we Zimbabwe National Chamber of Commerce ko Bulawayo abathi kumele ukulumende asebenzise inzuzo evela emsebenzini wokuthengiswa kwamatshe aligugu amadayimana ukwenzela ukukhuphula iholo lezisebenzi.
