Ukudonselana amandla phakathi kwebandla le Zanu PF sokufike kusibanga saphezulu kulandela imizamo yokuxotsha unobhala obona ngenhlelo zebandla, uMnu. Savior Kasukuwere.
UKasukuwere ukhanya esehlule imizamo yabakade befuna ukumxotsha ngoba ulosekelo lukaMongameli Robert Mugabe.
Kumaviki ambalwa adluleyo abasekeli bezigaba zebandla leZanu PF bebesenza imihlangano bevumelana ukuba kaxotshwe uKasukuwere ngababemethesa amacala ambalwa agoqela elokungahloniphi uMugabe lamanye amacala ambalwa.
Kodwa uMugabe ukhuze abafuna ukuxotsha uKasukuwere esithi nxa belezikhalazo kumele balandele isisekelo sombuso webandla hatshi ukumsukela bengelabufakazi olumqotho.
Kodwa umbuzo osukhona ngothi kanti vele isisekelo sombuso besingaphi ngesikhathi kuxotshwa abanye abafana lowayengumsekeli kamongameli, uNkosikazi Joice Mujuru.
Ukuhlaziya loludaba sixoxe lengcwethi ecubungula ezombusazwe, uMnu. Dinizulu Macaphulana, endawonye lelunga lebandla le Zanu PF, uMnu. Effort Nkomo, onguye osungule lingxoxo.
