Intengo yegazi, ekade ithwalise inengi nzima, isiyehlisiwe, ngesikhathi inhlanganiso ekhangela ukuqoqwa kwalo isungula umkhankaso wokuthi uzulu aze ngobunengi ukuzokupha igazi ukuze isiphala sibe legazi elaneleyo kunyanga zikaMpalakazi lo Zibandlela.
Intengo yegazi yehliswe ivela phezu kwekhulu lamadola-$135 isiya kukhulu-$100, ezibhedlela zikahulumende, kwathi ezibhedlela ezizimeleyo yaya kukhulu lamatshumi amabili $120, livela phezu kwekhulu lengxenye - $161.
Lokhu kuza ngesikhathi sokube lokukhonona kakhulu uzulu ethi uhulumende ahlawulele ingxenye ngoba intengo yegazi isiphezulu kakhulu okwenza inengi kuzulu lingenelisi ukulithola lalapho lisengozini enkulu.
Loludaba lokuthengisela izigulane igazi luvele luvusa ukungezwani emphakathini, inengi lingazwisisi ukuthi vele kungani lithengiswa ngemva kokutholakala kungela mbadalo kulabo abazinikelayo ukupha igazi.
Isakhamuzi, uNkosazana Precious Mudenge, uthi lanxa ukwehliswa kwentengo lokhu kuncomeka, intengo le ilokhu iphezulu kakhulu nxa kukhangelwa umumo wezenotho eZimbabwe lapho inengi elehluleka khona ukuthenga isinkwa kodwa lokhu.
Osakhulayo, uAmanda Ndlovu, opha igazi, uthi leli linyathelo elihle lokuthi intengo yehliswe ukuze inengi kuzulu alifinyelele ngoba livele lithengiselwani igazi bona belipha mahala.Umongikazi, uNkosikazi Progress Dube, uthi liqiniso ukuthi kulezigulane ezibhubha ngenxa yokwehlulwa yintengo yegazi ephezulu.
Kukhona abangakwenza bona ezibhedlela, kodwa uthi lapho sokudingakala igazi labo basuka baphelelwe ngamasu ngoba bangeke balithole kwenye indawo ngaphandle kwe National Blood Services Zimbabwe lapho elithengiswa khona.
Kusenjalo, linhlanganiso yeNBSZ ithi iyaqala umkhankaso wokudinga igazi kusukela ngoLweSithathu kusiya ekupheleni kukaZibandlela. Kuyabe kukhangelwe abatsha kumkhankaso wePledge 25 lapho abatsha abakhuthazwa ukupha igazi izikhathi ezingamatshumi amabili lanhlanu bengakabi leminyaka engamatshumi amathathu.
Umnumzana Sifundo Ngwenya owenhlanganiso le koBulawayo, uthi bayaqhubeka bekhankasa kabanzi bezama ukukhuthaza uzulu ukuthi azephathisa ekupheni igazi.
Lanxa besebenzelana kakhulu labasakhulayo uthi bakhankasela ukuthi abadala labo baphe igazi, njengoba nje izikolo zivalwa, ikakhulu labo abalohlobo lwe Type O.
Okwakhathesi uthi abantu bapha igazi ngendlela encomekayo okokuthi bakhangelele ukuba lelaneleyo eziphaleni zabo ngesikhathi sekhefu lekhisimusi.
UMaNdlovu uqhubeke esithi kuyadingeka imikhankaso ezanika abantu ulwazi ngokuqakatheka kokupha igazi njalo ikhuthaze labo abathandabuzayo ngoba zinengi izizatho ezenza uzulu esabele khatshana lapho kukhulunywa ngokupha igazi.Uhlobo lwegazi iType O, liqakatheke kakhulu ngoba lilakho ukunikwa yiloba bani kungakhathalekile ukuthi yena elakhe igazi ngumhlobo bani. Ezinye inhlobo zegazi ezibalisa uA, B loAB, zinikwa kuphela labo abalalolo hlobo lwegazi.
Umkhankaso lo oqala ngoLweSithathu kusiya ekupheleni kukaZibandlela uphathwa ngaphansi kwendikimba ethi, ‘Blood Connects Us All’, kukhangelelwe ukuthola igazi elingaphezu kwama unit azinkulungwane eziyisithupha – 6 690.