Inhlanganiso ye Solidarity Peace Trust ithi indlala ilokhu ibhahile esigabeni se Matabeleland ngenxa yokuswelakala kwesivuno esithe xaxa nyakanye kanye lokuvalwa kwamafekithali okuthathele inengi labantu imisebenzi.
Inhlanganiso le ithi indlala izamemetheka uhulumende we South Africa engaqhubeka exotsha izizalwane zeZimbabwe ezihlala kulelolizwe ngokungekho emthethweni ngoba abaxotshiweyo laba bazakwabelana ukudla okuncinyane okukhona njalo bengasenelisi ukuthengela imuli zabo ukudla.
ISolidarity Peace Trust ithi eGwanda kulemuli ezihlala ilanga lonke zingadlanga, kukanti ezinye imuli zalahlekelwa yizifuyo ngenxa yokuswelakala kwamadlelo.
UMnu. Thandeko Zinti Mnkandla omela iGwanda North edale lephalamende utshele uSithandekile Mhlanga we Studio 7 ukuthi inengi labantu alitholanga isifuno esihle ekuqaleni kwalumnyaka njalo akulancedo abaluthola kuhulumende lakunhlanganiso ezizimeleyo.