amalinks wokungena

Breaking News

Inkampani ye Essar Africa Holdings Ithi Kayisoze Iholise Izisebenzi Ngeviki Ezayo


Izisebenzi zenkampani yama Ndiya iEssar Africa Holdings eyavuselela iZimbabwe Iron and Steel Company zithi sebetshelwe ngabaqhatshi ukuthi kabasoze bahole ekupheleni kwenyanga njengoba sokulokudonselana lohulumende ngokumele kwenjiwe esigabeni se Chivu le Mwenezi, eMasvingo Pprovince.
Umnu. Partson Mubaiwa, ongumgcinisihlalo we New Zimbabwe Steel Limited Workers Council uthi abaqondisi benkampani le bathi iholo lizatholakala nxa udaba lolu lungalungiswa.

Uhulumende wathi elobelani isivumelwano le Essar Africa Holdings lonyaka wathi uzanika inkampani le okwenjiwayo okuyisilinganiso sokuyi 40 billion metric tonnes.

Kodwa-ke uhulumende uthi angeke akwenze lokhu ngoba konke okwenjiwayo ngokukazulu. Kukhanya njalo uhulumende selwisana lomunye umuntu owayeyisisebenzi se Ziscosteel obikwa ukuthi wazinika konke okwenjiwayo okwakumele kube sezandleni ze New Zimbabwe Minerals, edlelana le New Zimbabwe Steel Limited.

Umnu. Mubaiwa uthi okwenzakalayo eNew Zimbabwe Steel kwethusa izisebenzi esezithume abanye bazo ukuyacela uncedo kuMongameli Robert Mugabe.

Kusenjalo, umsekeli womphathintambo wezemigodi uMnu. Gift Chimanikire uthi uhulumende kafuni ukudiliza isivumelwano owasenza lenkampani ye Essar Africa Holdings loba nje kusobala ukuthi kunengi okuhluphayo.

Umnu. Chimanikire uthi ukuhulumende uselwisana lendoda le eyayisebenza eZiscosteel eyethatha konke okwakumele kubesezandleni ze New Zimbabwe Minerals. Ngokunye lokhu okwenjiwayo okwakumele kunikwe inkampani yama Ndiya.

Umnu. Chimanikire uthi udaba lolu soluhanjiswe emthethwandaba we Supreme Court njengoba yonke inotho yokwenjiwayo okuse Mwenezi kungamelanga kube sezandleni zomuntu.

XS
SM
MD
LG